Manja prezanton qëndrimin e PS-së për Ballukun: Pretendimet se Kuvendi pengon drejtësinë janë politike

9 Mars 2026, 10:33, Politikë CNA

Manja prezanton qëndrimin e PS-së për Ballukun: Pretendimet se

Deputeti i Partisë Socialiste dhe kryetari i Komisionit të Ligjeve, Ulsi Manja, prezantoi në mbledhjen e Grupit Parlamentar të PS-së raportin e shumicës lidhur me kërkesën e Strukturës së Posaçme kundër Korrupsionit dhe Krimit të Organizuar për autorizimin e Kuvendit në lidhje me deputeten Belinda Balluku.

Manja u shpreh se në vlerësimin e kërkesës së SPAK-ut, shumica është ndalur te nevoja për masën e sigurisë dhe nëse plotësohen kushtet ligjore për vendosjen e saj, përfshirë rrezikun e prishjes së provave apo largimit nga vendi. Ai theksoi se raporti është bazuar në provat dhe arsyetimin e paraqitur nga SPAK-u, por pa bërë një vlerësim të drejtpërdrejtë të provave.

Sipas Manjës, roli i Kuvendit nuk është të gjykojë provat, por të kryejë një kontroll kushtetues nëse kërkesa e prokurorisë është në përputhje me procedurën. Ai bëri të ditur se nuk u arrit të hartohej një raport i përbashkët me opozitën, pasi palët kanë qëndrime të ndryshme për rolin që duhet të ketë Kuvendi në këtë proces.

“Raporti i opozitës mbron tezën se Kuvendi duhet të kufizohet vetëm në një verifikim formal dhe të mos ndërhyjë në vlerësimin e masës së sigurisë. Sipas nesh, kjo qasje nuk përputhet me nenin 73 të Kushtetutës”, u shpreh Manja.

Ai shtoi se ky nen i jep Kuvendit një rol jo thjesht formal në dhënien ose jo të autorizimit për heqjen e imunitetit të deputetit. Sipas tij, shqyrtimi i kërkesës nga Kuvendi është një proces thelbësor për të garantuar respektimin e të drejtave dhe lirive të anëtarëve të tij.

Manja theksoi gjithashtu se imuniteti për arrestimin dhe ndjekjen penale të deputetëve nuk ekziston më që prej ndryshimeve kushtetuese të vitit 2012. Ai bëri të ditur se ndaj Ballukut ka një hetim penal që prej gushtit 2024 dhe se aktualisht ndaj saj është vendosur masa e ndalimit të daljes jashtë shtetit.

“Pretendimet se Kuvendi, duke u kujdesur për të garantuar barazinë para ligjit dhe pavarësinë e hetimit, pengon drejtësinë, nuk kanë bazë ligjore, por janë pretendime politike”, përfundoi Manja./ CNA