"Kemi fituar një betejë, jo luftën"/ Berisha: Protestat e opozitës ndaluan një grusht shteti brenda shtetit

10 Shkurt 2026, 18:44, Politikë CNA

"Kemi fituar një betejë, jo luftën"/ Berisha: Protestat

Kryetari i PD-së, Sali Berisha ka mbajtur fjalën e tij në protestën që po zhvillohet pasditen e sotme para Kryeministrisë. Berisha u shpreh gjatë fjalës së tij se opozita dhe protestat e tyre arritën të ndalojnë atë që ai e cilësoi si “një grusht shteti brenda shtetit”.

Ndër të tjera, kryedemokrati tha se kryeministri Edi Rama i shpalli luftë drejtësisë, për të mbrojtur vjedhjet e veta. Ai tha më tej se Rama është i vetmi armik i shqiptarëve që po shpopullon vendin.

“Ishim në pragun e një grushti shteti brenda shtetit. Përdori gjithë ekzekutivitn për të ushtruar presion ndaj Gjykatës Kushtetuese për të mbrojtur Belinda Ballukun. Faza e parë e këtij grushti shteti dështoi. Ju guximtarë më protestën tuaj keni pjesën tuaj në këtë pjesë. Revolta juaj në protestën e kaluar dha sinjal brenda dhe jashtë vendit se nuk do të tolerojmë grushtin e shtetit për të mbrojtur vjedhjet e Edi Ramës. Shkurti është muaji kur në zvarritëm diktatorin, është muaji ku do të shpëtojmë Shqipërinë. U bëtë lajm kryesor në Shqipëri dhe botë. Po të mos ishit Edi Rama do t’ja kishte dalë më grushtin e shtetit. Kam denoncuar në kancelaritë ndërkombëtare kreun e narkoshtetit të parë dhe të vetëm në Europë. Revolta juaj është zëri i ndërgjegjes dhe dinjitetit qytetar. Mund të thonë shumë gjëra kundra nesh, por e vërteta është se opozita parandaloi grushtin e shtetit më të rrezikshëm në historinë eShqipërisë. Kemi fituar një betejë por jo luftën. Edi Rama i ka shpallur luftë drejtësisë. Edi Rama është armiku më i rrezikshëm i Shqipërisë dhe shqiptarëve”, u shpreh kreu i PD-së.

Gjatë fjalës së tij, Berisha foli edhe për pretencën e Prokurorisë së Hagës ndaj ish-krerëve të UÇK-së, ku tha se ishte identike me pamfletet e ultranacionalistëve serbë.

“Dje në Hagë prokuroria paraqiti një pretencë kundër ish-krerëve të UÇK-së, identike me pamfletet e ultrancionalistëve serbë. U bëj thirrje të vlerësojnë gjithçka mbi bazën e ligjit. Të shpallin tëpafajshëm ata burra që mbrojtën shqiptarët nga gjenocidi serb”, tha Berisha. /CNA