Ilda Zhulali: Soros, përfituesi kryesor i fondeve edhe në Shqipëri

5 Nëntor 2024, 10:50, Politikë CNA

Ilda Zhulali: Soros, përfituesi kryesor i fondeve edhe në

George Soros

Anëtarja e Këshillit Bashkiak dhe drejtuesja e Departamentit të Politikës së Jashtme në Partinë Demokratike, Ilda Zhulali, ka deklaruar se shoqëritë e George Soros janë përfituese kryesore të fondeve të huaja.

Zhulali është shprehur se në Shqipëri, fondacioni "Shoqëria e Hapur" është një nga përfitueset kryesore e fondeve të huaja, qoftë ato që vijnë nga ambasada amerikane, USAID, ose edhe ato që vijnë vetë nga Bashkimi Europian nga fondet IPA.

Sipas saj është kjo shoqatë që bën edhe shpërndarjen e fondeve tek OJQ të tjera më të vogla dhe sigurisht që përcakton edhe agjendën, me çfarë do të merren ato.

“Në organizatat ndërkombëtare, qoftë edhe në shoqatat që janë ngritur apo fondacionet, janë të gjithë pjesë e të njëjtit rrjet njerëzish, te këto nuk penetron dot askush dhe çdo njeri që bën sadopak oponencë, ose fshihet, ose mendimi i tij tjetërsohet, kanalizohet.

Unë i ndjek rregullisht takimet që bëhen edhe në kuadër të procesit të integrimit, sepse aty ka një vëmendje të shtuar dhe vetëm Bashkimi Europian jep miliona çdo vit që të fuqizohet shoqëria civile. Dhe këtu ke vetëm një numër të caktuar OJF-sh, të cilët takohen me njëri-tjetrin.

Takohen me një ambasadë që jep fondet kryesore dhe në fund të ditës ti nuk kupton se çfarë është diskutuar aty. Vetëm thuhet, kënaqësi e madhe, u mblodhëm, diskutuam për një, dy, tri çështje dhe lihet aty. Nuk prodhohet, pra, asnjë mendim. Ka një ligjërim steril. E rëndësishme është që në këto takime të mos ketë asnjë përfundim që konteston zbatimin e një politike ose hartimin e gabuar të saj.

'Shoqëria e Hapur', Soros, ka një rol kyç, Nuk është se e themi vetëm ne. Nuk është një teori konspirative shqiptare. Ky është një fenomen që është studiuar edhe në Europë, edhe në Amerikë dhe ka edhe një emër dhe quhet kundërrevolucioni parandalues. Pra, kjo është menduar si një strategji në rang botëror.

Nuk ka lidhje vetëm më Shqipërinë. Dhe është ndërtuar në të gjithë botën një rrjet, i cili ka për detyrë çdo lloj kundërrevolucioni ose revolucione të reja që mund të lindin në shoqëri dhe mobilizimin e masave. Dhe kjo është një strategji e së majtës në nivel botëror ku Soros ka rolin kryesor edhe përmes shtrirjes së jashtëzakonshme që ka në vende të ndryshme të botës, por veçanërisht në qendrat e influencës ku ka arritur që të vendoset me forcën financiare në mënyrën se si është imponuar në qendrat e vendimmarrjes.

Dhe në Shqipëri po të shikoni, fondacioni 'Shoqëria e Hapur' është një nga përfitueset kryesore të fondeve të huaja, qoftë ato që vijnë nga ambasada amerikane, USAID, ose edhe ato që vijnë vetë nga Bashkimi Europian nga fondet IPA. Dhe pastaj është kjo shoqatë që bën edhe shpërndarjen e fondeve tek OJQ të tjera më të vogla dhe sigurisht që përcakton edhe agjendën, me çfarë do të merren ato.

Çfarë çështjesh do të trajtojnë dhe se si do ta paralizojnë në njëfarë mënyre të gjithë oponencën që mund të gjallojë dhe të ketë brenda shoqërive dhe të asgjësojë trupat e ndërmjetëm të shoqërisë që kontestojnë qeverisjen. Në Shqipëri nuk ka sindikatë. Dhe jo vetëm që nuk ka sindikata, por edhe çdo zë tjetër kritik tashmë është heshtur, ose duke e fshirë nga jeta publike sepse këta nuk përfshihen në asnjë aktivitet të këtyre shoqatave, nuk u jepen para, nuk u jepen donacione.

Dhe është e njëjta dorë që kontrollon këtë qarkullim të madh parash dhe flasim për miliona euro çdo vit. Nuk është shaka, kështu që është e organizuar dhe nuk është vetëm shqiptare. Është në nivel botëror. Por neve do të bëjmë pjesën tonë dhe e rëndësishme është që çdo shoqëri gjithsesi ka mekanizmat e vet që i vë në përdorim që të mos mposhtet", tha Zhulali në një intervistë televizive./ CNA