Grupi i Bashës kërkoi hetim/ Kryebashkiaku i Divjakës: Gazmend Bardhi po më shantazhon

21 Korrik 2022, 17:24, Politikë CNA

Grupi i Bashës kërkoi hetim/ Kryebashkiaku i Divjakës: Gazmend

Fredi Kokoneshi, kryetari i Bashkisë Divjakë

Grupi i deputetëve të Lulzim Bashës i është drejtuar me një kërkesë Prokurorit të Përgjithshëm për hetimin e Fredi Kokoneshit, kryetarit të Bashkisë Divjakë, pasi pretendojnë se rezulton i përfshirë dhe i dënuar për trafik të qenieve njerëzore në Itali.

Për këtë ka reaguar vetë Kokoneshi, i cili mohoi akuzat dhe deklaroi se Gazmend Bardhi po e shantazhon.

Kryebashkiaku i Divjakës tha se akuzat e PD-së janë të përsëritura, ndërsa përmendi një vendim të Prokurorisë, që e ka cilësuar të pastër figurën e tij, në 15 korrik të 2019-ës.

“Ka një vendim të prokurorisë 15 korrik 2019 ku figura ime është e pastër, pas kontrolleve brenda dhe jashtë shtetit. Akuzat kanë ardhur për shkak të një anëtari të këshillit kombëtar të PD, Dritan Stërkaj. Resorti i tij ‘Divjaka resort’ është strehë e Gazmend Bardhit. Ashtu si i kam kallëzuar në prokurori do t'i kallëzoj sërish! Gaz Bardhi do të më shantazhojë sepse po verifikoj pronat e Divjaka Resort”, theksoi Kokoneshi për mediat.

Ndërkohë, me anë të një statusi në rrjetet sociale, kryebashkiaku socialist shprehet se këto akuza bëhen si shantazh për të mbrojtur uzurpuesit e pronave shtetërore në bregdet.

“Shpifja e radhës

-Një grup prej 15 deputetësh të PD, vijuan me shpifjen e radhës, duke përsëritur veten e tyre për një kërkesë që e kanë vërë në vitin 2018.

Po këta deputetë në vitin 2018,duke mos poseduar asnjë të dhënë empirike, ngritën të njëjtat pretendime mbi personin tim. Sqaroj të gjithë opinionin publik, se nga hetimet që Prokuroria e Përgjithshmë gjatë vitit 2018 që ka kryer brenda dhe jashtë vendit, nuk ka konstatuar asnjë shkelje nga ana ime. Për ta vërtetuar këte po ju paraqes vendimin e Prokurorisë së Përgjithshme. Po këta deputetë për të mbrojtur interesat oligarkëve të tyre hedhin baltë dhe vazhdojnë të shpifin ende. Kur prej vitit 2019 kanë përfunduar çdo hetim në të dhënat e prokurorisë nuk rezulton asnjë shkelje. Kjo shpifje bëhet për të shantazhuar kryetarin e Bashkisë për të mbrojtur uzurpuesit e pronave shtetërore në bregdet. Kjo kohë ka mbaruar dhe ju do të përgjigjeni para drejtësisë. Në lidhje me ketë shpifje, Bashkia e Divjakës nuk do të heqë dorë nga mbrojtja e pronave të qytetarëve të saj dhe do t’i tregojë rrugën çdo grabitqari të aseteve publike të Bashkisë Divjakë”, shkruan ai./ B.A. – CNA.al