web counter
LEXO PA REKLAMA!

SHKARKO APP

App Store
Google Play

Fitorja e Kombëtares/ Berisha: Më e bukura që kam parë ndonjëherë, pati momente pikante

13 Tetor 2023, 12:38, Politikë CNA
Fitorja e Kombëtares/ Berisha: Më e bukura që kam parë
Ish-kryeministri Sali Berisha

Ish-kryeministri Sali Berisha e nisi konferencën e përjavshme me gazetarët me një reagim për fitoren e magjishme të Kombëtares në ndeshjen e mbrëmjes së kaluar me Çekinë.

Berisha falënderoi ekipin e Kombëtares për ndeshjen, për të cilën tha se ishte më e bukura që ka parë ndonjëherë tek ekipi shqiptar.

“Nuk mund të fillohet ky takim me ju pa një urim shumë të veçantë për Kombëtaren tonë, ekipin në tërësi, golashënuesit e mbrëmshëm, Seferin dhe Asanin, me golat e tyre fantastikë, trajnerin, i cili po e ngjit këtë skuadër, këtë ekip kombëtar në nivelet më të larta.

Magjia e këtij trajneri është pothuaj reale. Silvinjo është shkrirë në një me psikologjinë e lojtarëve dhe krijon tek ata siguri të madhe dhe motivim të fortë.

Ndeshja në vlerësimin tim modest, ishte më e bukura e Kombëtares sonë që unë kam parë ndonjëherë”, u shpreh ai, ndërsa nuk i kurseu as sulmet për kryeministrin Edi Rama.

Ai deklaroi se një moment pikant ishte qëndrimi i Ramës, për të cilin pretendon se ishte nxirë sterrë dhe rrinte si në gjemba.

“Por nuk ishte vetëm fusha, nuk ishin vetëm entuziazmi dhe ndezja flakë e fansave nën himnin e kënduar nga Shkurte Fejza, po pati momente po kaq pikante sa edhe vetë golat. Sa edhe vetë himni.

Ju e patë, aq sa ishte të themi lartësimi dhe krenaria që krijoi ekipi me lojën e tij fantastike, por aq ishte domethënia e ndëshkimit që i bënë përçarësit të kombit, i cili nxinte sterrë.

Ju jeni dëshmitarë se si rrinte si në gjemba. Si tiran, pa duartrokitur njëherë ekipin. Sepse shihte ata. Përçarësi i kombit”, theksoi kryedemokrati./ CNA





Lajmet e fundit nga