“E treta e vërteta”/ Berisha : E premtja që vjen do ta tmerrojë Veliajn
11 Prill 2024, 20:38, PolitikëCNA
Lideri demokrat, Sali Berisha
Lideri demokrat, Sali Berisha mbrëmjen e sotme i ka bërë sërish thirrje Erion Veliajt, që të japë dorëheqjen dhe të mos presë të premten e ardhshme.
Berisha theksoi se e premtja që vjen do ta tmerrojë Erion Veliajn, dhe sipas kryedemokratit, kjo do jetë e treta e vërteta.
“Mirëmbrëma dhe një përshëndetje të përzemërt për ju misionarë të pamposhtur të dinjitetit, të shpresës.
Luftëtarë të të vërtetës.
Përshëndetje oratorëve të mrekullueshëm që kanë shndërruar këtë platformë në platformat e vërtetave më qenësore, më jetike për shqiptarët.
Por unë kam sot një përshëndetje më të veçantë për të gjithë protestuesit kundër kryehajnit të Bashkisë së Tiranës, të cilët me protestën e tyre përcollën mesazhin në mbarë Shqipërinë dhe botën se shtëpia e parë e qytetarëve të Tiranës është e pushtuar nga një hajdut ordiner.
Se shtëpia e parë e qytetarëve të Tiranës është e përdhosur nga një hajdut që vjedh 100 përqind të fondeve publike dhe i shndërron ato në hotele me 5 yje.
I shndërron ato në pallate 10 e 12-katëshe.
I shndërron ato në lokale dhe klube.
I shndërron ato në udhëtime dhe vakanca në të katër anët e dheut.
I shndërron ato në llogari të fshehta offshore.
Protesta e sotme ishte një protestë që bashkia nuk e ka parë ndonjëherë.
Dhe e garantoj se e premtja që vjen, do ta tmerrojë Erion Veliajn.
Të premten, e treta e vërteta.
Erion Veliaj jep dorëheqjen, mos u fut më në bashki.
