web counter
LEXO PA REKLAMA!

SHKARKO APP

App Store
Google Play

Dita Botërore e Dhurimit të Gjakut/ Meta thirrje qytetarëve

14 Qershor 2022, 20:22, Politikë CNA
Dita Botërore e Dhurimit të Gjakut/ Meta thirrje qytetarëve
Presidenti Ilir Meta

Në Ditën Botërore të Dhurimit të Gjakut, Presidenti Ilir Meta ka bërë thirrje që të gjithë qytetarët t’i bashkohen kauzës humanitare.

Me anë të një statusi në rrjetet sociale, Meta falenderon vullnetarët që i janë përgjigjur thirrjes për të dhuruar gjak, institucionet qendrore dhe lokale, komunitetet fetare, Qendrën e Transfuzionit të Gjakut dhe mjekët.

Ai tregon se sot ka vlerësuar Presidentin e parë të Kryqit të Kuq Shqiptar pas Luftës së Dytë Botërore, Dr. Elmaz Konjari, për angazhimin e dhënë për ringritjen dhe veprimtarinë humanitare të kësaj shoqate.

“Në Ditën Botërore të Dhuruesve të Gjakut inkurajoj të gjithë qytetarët, në veçanti të rinjtë dhe të rejat në mbarë vendin të mposhtin indiferencën dhe t’i bashkohen kësaj kauze fisnike e humane duke u bërë dhurues të rregullt për të shpëtuar jetë dhe ndihmuar këdo që ka nevojë kritike për gjak.

Në këtë ditë të rëndësishme ndihem krenar për Aleancën e Dhurimit të Gjakut dhe kontributin e saj të qenësishëm për këtë kauzë, sidomos në kriza të vështira, si pandemia Covid-19. Falenderoj të gjithë vullnetarët që i janë përgjigjur thirrjes për të dhuruar gjak, institucionet qendrore dhe lokale, që kanë promovuar dhe nxitur në mënyrë të vazhdueshme dhurimin e gjakut, komunitetet fetare, Qendrën e Transfuzionit të Gjakut dhe mjekët e saj, që punojnë çdo ditë me pasion, për të siguruar gjak për të sëmurët në nevojë.

Mirënjohje të veçantë për Kryqin e Kuq Shqiptar, shoqatën më të vjetër humanitare në Shqiperi, që jep një kontribut të vazhdueshëm dhe që është gjithmonë e angazhuar në sensibilizimin për dhurimin e gjakut dhe përmirësimin e jetës dhe dinjitetit të njerëzve në nevojë!

Në vlerësim të kontributit 100-vjeçar të Kryqit të Kuq Shqiptar, vlerësova sot, Presidentin e parë të saj pas Luftës së Dytë Botërore, Dr. Elmaz Konjari, për angazhimin e vyer, të dhënë për ringritjen dhe veprimtarisë humanitare të kësaj shoqate”, shkruan Kreu i Shtetit./ B.A. – CNA.al





Lajmet e fundit nga