34 vjet nga demostrata antikomuniste e Shkodrës/ Berisha: Hapi siparin e ngjarjeve të mëdha

14 Janar 2024, 17:56, Politikë CNA

34 vjet nga demostrata antikomuniste e Shkodrës/ Berisha: Hapi siparin e

Ish-kryeministri Sali Berisha ka kujtuar demostratës antikomuniste të Shkodrës, në 34 vjetorin e saj.

Me anë të një statusi në rrjetet sociale, Berisha thotë se mijëra shkodranë iu përgjigjën thirrjes së grupeve antikomuniste dhe dolën në një demostratë të fuqishme për të çliruar qytetin e tyre nga kulti i njërit prej diktatorëve më gjakësor të kohërave, Josif Stalin.

Ai deklaron se kjo ngjarje historike hapi siparin e një seri ngjarjesh të mëdha të atij viti që do kurorëzoheshin me vendosjen e pluralizmit politik në Shqipëri, me lëvizjen studentore të dhjetorit të vitit 1990.

34 vjet nga demostrata antikomuniste e Shkodrës/ Berisha: Hapi siparin e

“Sot 14 janari, 34 vjetori i demostratës antikomuniste të Shkodrës!

Të dashur miq, si sot 34 vite më parë grupet antikomuniste, qytetarët dhe studentët e Universitetit të Shkodrës inaguruan Vitin e Ri në Shqipëri, vitin e mrekullisë për shqiptarët me një betejë të ashpër me diktaturën komuniste, demostratat e fuqishme të datave 13-14 janar 1990 për rrëzimin e bustit të diktatorit komunist Josif Stalin.

Me datën 13 dhe veçanërisht me datën 14 janar të vitit 1990, mijëra qytetarë të Shkodrës iu përgjigjën thirrjes së grupeve antikomuniste, mbushën dhe dolën në një demostratë të fuqishme për të çliruar qytetin e tyre nga kulti i njërit prej diktatorëve më gjakësor të kohërave, Josif Stalin dhe hequr bustin e tij nga qendra e qytetit.

Regjimi diktatorial e shtypi me egërsi dhe brutalitet me të gjitha mjetet e dhunës demostratën e 14 janarit dhe arrestoi, torturoi dhe dënoi me dënime të rënda për veprimtari antishtetërore terroriste organizatorët e saj Ded Kasnecin, Rin Monajkën, Flamur Elbasnani, Gjergj Livadhin, Ndoc Liqejzën, vëllezërit Haxh, Gjovalin Ralba, Viktor Martini, Nikolin Thana, Tonin Dema, Nikolin Margjini, Bac Bilali, Ylli Gërshana, Klaudio Daka, Aldo Perizi, vëllezërit Alibali Hana Kraja etj.

Por jehona e demostratës së fuqishme antikomuniste e Shkodrës, qytetarëve të saj ushtoi fuqishëm në të katërta anët e vendit, por dhe në mbarë botën. Kjo ngjarje historike e hapi siparin e një seri ngjarjesh të mëdha të atij viti që do kurorzoheshin me vendosjen e pluralizmit politik në Shqipëri me lëvizjen studentore të dhjetorit të vitit 1990.

Sot në këtë 34 vjetor le të shprehim ne të dashur miq nderimin dhe mirënjohjen tonë më të thellë për qytetarët pjesmarrës dhe organizatorët e demostratës së 14 janarit 1990 të Shkodrës, Rozafës së Lirisë. Rroftë Shkodra!”, shkruan Berisha./ CNA