E fundit!

12:50 Aktualitet

GJKKO gjobit avokatin e pandehur të Erion Veliajt

GJKKO ka gjobitur avokatin e pandehur të kryebashkiakut të...

Harta e re gjyqësore/ Ulsi Manja: Ulje ngarkesash dhe shkurtim kohe për dhënie drejtësie

12 Janar 2024, 13:34, Politikë CNA

Ulsi Manja

Ministri i Drejtësisë, Ulsi Manja, gjatë një prononcimi nga Korça se tashmë harta gjyqësore është mekanizëm ligjor i bërë realitet.

Teksa përuroi Zyrën e Ndihmës Juridike falas ai tha se me sistemin e ri do eliminohet ngarkesa në gjykata si dhe do shkurtohet ndjeshëm koha e dhënies së drejtësisë.

Fjala e plotë:

Edhe çështja e hartës së re gjyqësore që ka qenë mekanizëm ligjor shumë i debatuar dhe diskutuar, tashmë është realitet. Harta e re gjyqësore kishte qëllim të rriste eficiencën e sistemit të drejtësisë. Nuk dua të ndalem te konfirmimi i hartës gjyqësore edhe nga Gjykata Kushtetuese, sepse është çështje e tejkaluar, por kujdesi ynë është që qytetarëve t'u garantohet akses te drejtësia. Edhe kjo zyrë që hapim sot shkon në të njëjtin drejtim. Tashmë çështja e dosjeve në gjykata apo ngarkesa e tyre, është një problem që është një nga sfidat e reformës në drejtësi që kemi sot. Kishte dosje të prapambetura edhe para reformës në drejtësi, por u krijua një mbivendosje dosjesh në të gjitha shkallët e sistemit të drejtësisë për shkak edhe të procesit të Vetting-ut dhe largimit të gjyqtarëve dhe prokurorëve nga ky proces. U krijuan një numër i mjaftueshëm vakancash në sistem, tashmë jemi në një realitet tjetër, sistemi i ri i drejtësisë është drejt konsolidimit së bashku me KLGJ kemi një strategji të qartë të eliminimit të kësaj ngarkese, jo vetëm nëpërmjet plotësimit të vakancave, por dhe me shkurtimin e kohës së dhënies së drejtësisë. Dua t'u jap një të dhënë, nga data 1 shkurt e vitit 2023, në kaluam me një gjykatë Apeli të Juridiksionit të Përgjithshëm ku u mbyll dhe Gjykata e Apelit të Korçës. Eficienca e pasjes së një gjykate Apeli në Tiranë e ka shkurtuar kohën e dhënies së drejtësisë në gjykatën e apelit me 1 vit e gjysmë. Çka do të thotë që një Gjykatë Apeli që sot ka 26 gjyqtarë apo 30 gjyqtarë, kur të kompletohet me numrin e plotë të gjyqtarëve që janë 78, do të thotë që jo vetëm do eliminohet ngarkesa, por do shkurtohet ndjeshëm koha e dhënies së drejtësisë. Ne na takon të kujdesemi që edhe qytetarët e Korçës, t'u garantojmë aksesin në sistem që të mos ju mungojnë shërbimet./CNA