E fundit!

12:20 Aktualitet

EKSKLUZIVE/ Ja kandidatët për postin e nëndrejtorit në Policinë e Shtetit

CNA ka zbuluar ekskluzivisht se cilët do të jenë kandidatë...

Lali në kërkim të ‘Hair Fermanit’

29 Dhjetor 2024, 11:16, Opinione Erion Dasho

Askush nuk ka dyshim për arsyen e vërtetë të udhëtimit të Lalit hajdut të Boratit në SHBA. Takimi i tij më i rëndësishëm do të jetë me Alex Soros në përpjekje për të marrë një dekret faljeje nga pronari real i reformës në drejtësi dhe tutori 'de facto' i liderëve kryeneçë të Ballkanit Perëndimor.

Ajo që i vendos vulën kësaj është qëndrimi i SPAK-ut, madje edhe i vetë Boratit të cilët pothuajse e kanë pranuar hapur në media se nuk janë të gatshëm ta vendosin Lalin në gijotinë pa u ardhur nga përtejdetit "katil fermani" i Sorosit të vogël.

Edhe dje Borati bëri një gjysmë mbrojtje të Lalit, ndonëse pa entuziazmin me të cilin mbronte Beqen e vet të koncesioneve. Gjithsesi, në varësi të urdhrave që do të vijnë, intervista e djeshme në "Zërin e Amerikës" mund të pasohet me lëvizje në mbrojtje të Veliaj ose me intervista që dënojnë "hajdutin", "armikun e ri të partisë" dhe "ngrënësin e dardhave".

Nga ana tjetër SPAK-u ka krijuar një dosje me gabime të rënda procedurale (të paktën sipas mbrojtjes ligjore të Lalit) dhe nuk ka hetuar ende dy aferat më përvëluese të Lalit, atë të djegësve dhe "5D"-në.

Me sa duket, edhe kalorësit e ndershmërisë së SPAK-ut janë duke pritur vendimin përfundimtar për Lalin. Një "hair ferman" do të bënte që prokurorët e SPAK-ut të vazhdonin me hetimet gjysmake dhe periferike që mund të rezultonin në pafajësi ose dënime të papërfillshme të Lalit. Krejt e kundërta do të ndodhte në rast të një "katil fermani", i cili do të shënonte jo vetëm fundin politik të Veliajt, por edhe do t'i hapte atij dyert e burgut për disa dhjetëra vite.

Ndërkohë nuk përjashtohen dy skenarë të tjerë:

Së pari, telashet që ka klani Soros me Presidentin në ardhje të SHBA-së. Kur mbetet më pak se një muaj nga ardhja në pushtet e Trampit, Alex Soros dhe miqtë (ose ish-miqtë) e tjerë të Lalit mund të jenë duke u marrë me strategjinë e tyre të mbijetesës dhe të mos kenë as kohë dhe as dëshirë për t'u marrë me hallet e Lalit. Ky skenar e lë Lalin në dorë të Boratit dhe SPAK-ut.

Së dyti, në mungesë të një fermani që e përcakton pa mëdyshje fatin e vet dhe, në varësi edhe të gjendjes psikologjike (e cila duket e rënduar kur sheh reagimin ditën e daljes nga SPAK dhe dy statuset e djeshme në përgjigje të deklaratave të opozitës), Lali mund të vendosë të marrë rrugën e Tigrit dhe të nisë jetën e të arratisurit të drejtësisë.

Inkursioni amerikan i Lalit në këtë fundvit nuk mund të mos jetë intrigues për shqiptarët të cilët kanë muaj të tërë që ndjekin telenovelën që ish-kolegët e sektit të rilindjen dhe ata të së ashtuquajturës drejtësi e re i kanë rezervuar "Mehmet Shehut" të dytë të shqiptarëve.

Do të kthehet nga Amerika me "katil ferman", "hair ferman", apo nuk do kthehet aspak? Për mendimin tim, asnjë skenar nuk është i përjashtuar...