Kush po na i dhunon, vret dhe keqedukon fëmijët?

6 Mars 2025, 20:44, Opinione Mentor Kikia

Kush po na i dhunon, vret dhe keqedukon fëmijët?
(Me shkas nga vendimi i qeverisë për të mbyllur platformën Tik-Tok dhe një ftesë për debat publik)
Dhunën në mesin e fëmijëve, mendoj se e shkaktojnë, nxisin dhe motivojnë disa faktorë.
Po përpiqem të jem telegrafik!

1-Prindërit: Kur fëmija vjen në shtëpi e thotë “u zura me njërin ne shkolle, me qelloi”, babai i thotë: Po ti, ku i pate duart? Kush është, se ja tregoj unë qejfin.

2-Prindërit: Kur fëmija vjen e thotë “më bërtiti mësuesja në shkollë”, dhe në vend që ta pyesë se çfarë bëre ti që të bërtiti, mami thotë: I’a tregoj unë qejfin asaj shtrigës, po nuk ia dhash flokët në dorë.

3-Prindërit: Kur fëmija vjen e thotë se mësuesi më shtyu (dmth me preku me dorë), në vend që ta pyesin, çfarë bëre ti, i thotë: S’ka lindur ai bir kurve të më prekë fëmijën me dorë mua.

4-Prindërit, që kur e kanë mundësinë ekonomike, i dehin fëmijët që në moshë të mitur me para, luks e makina të shtrenjta, duke i nxitur drejt një jete të harbuar dhe jashtë kontrollit.

5-Prindërit: Kur fëmija arrin në ekstrem dhe vret/plagos shokun, në vend që të kërkojnë ndjesë publike e të shndërrohen në flamurtarë të kauzës kundër dhunës, s’lënë gjë pa bërë, me të gjitha format, për ta shfajësuar fëmijën e për t'ia mbyllur çështjen në prokurori e gjykatë.

6-Prindërit, që janë shumë pak ose hiç fare bashkëpunues me shkollën, për mbarëvajtjen në mësime dhe edukimin e fëmijëve.

7-Shkolla, që ka zeruar me kohë dimensionin dhe misionin edukativ të fëmijëve.

8-Shkolla, që nga frika e prindërve dhe “opinionit publik”, fshesh incidentet mes fëmijëve, dhe kur ndodh të përdoren thikat e kaçavidat, përpiqet ta gjejë zgjidhjen tek fakti se “dhuna ndodhi jashtë gardhit të shkollës”.
9-Shkolla, familja, qeveria dhe shoqëria në tërësi, që e kanë degraduar figurën e mësuesit, duke e bërë leckë dhe pa pikë autoriteti para nxënësve.

10-Ministria e Arsimit, që për një video apo denoncim që del në rrjet, ku mësuesi ngre zërin në klasë, e shkarkon nga puna menjëherë, sepse kështu mendojnë prindërit dhe “opinioni publik”.

11-Qeveria, që mendon se shkolla më e mirë është godina më e bukur, e re dhe me ngjyra, dhe jo ajo çfarë ndodh dhe bëhet bëhet brenda kësaj godine.

12-Qeveria, që ka ngushtuar çdo hapësirë edukimi dhe argëtimi për fëmijët. Sepse nuk ka qendra jashtë shkollore, ku fëmijët të ushtrojnë talentet dhe të kalojnë kohë në mënyrë të kulturuar.

13-Qeveria, që ka lejuar të zhduket çdo hapësirë publike dhe për sheshe lojrash shërbejnë kantieret e ndërtimit apo sheshet e mbushura me karrige kafenesh.

14-Qeveria, që kurrë nuk ka dashur ta shikojë seriozisht problemin dhe të investohet për zgjidhje, por gjithmonë ka zgjedhur që kritikët ti akuzojë si “dashakeqë të arritjeve të saj”.

15-Media, që nuk prodhon asnjë program edukativ për fëmijë dhe prodhon dhjetra programe degjeneruese dhe ç’edukuese.

16-Media, që nuk lë lajm me rrahje, vrasje, dhunim e përdhunim, aksident më makinë, karrocë e biçikletë pa transmetuar.

17-Teknologjia, që i ka shndërruar fëmijët në skllevër dhe të varur prej saj.

18-Rrjetet sociale, përmes të cilave përhapen mesazhe, video, lojra të dhunshme që nxisin fëmijët t’i imitojnë.
Zgjidhja?

Shumë e vështirë, veçanërisht pasi ke përfunduar në fund të pusit.

A është e mundur t’ia nisim të korrigjohemi?