Kush po e shkatërron Pishë-Poron?

13 Maj 2026, 14:27, Opinione Mentor Kikia

Në zonën e mbrojtur natyrore Pishë Poro-Nartë është duke u punuar. Makineri të rënda, fadroma, kamionë që transportojnë inerte, betoniere etj., kanë prishur qetësinë e një parku pyjor.

Shqetësimit të qytetarëve dhe ambientalistëve, Ministria e Mjedisit iu përgjigj me këtë sqarim: Nuk është duke u zhvilluar asnjë degradim i zonës së mbrojtur Pishë Poro-Nartë. Nuk po bëhet ndërtim. Është bërë vetëm rrethimi i një prone private, me leje të KKT, për të kryer survejime gjeologjike”.

Faktet në terren të thonë të kundërtën!

Edhe IKMT sqaron: “Këto punime rezulton se po kryhen në bazë të Vendimit Nr.5, datë 29.04.2026 'Për kryerjen e punimeve të rrethimit dhe të punimeve përgatitore në funksion të ndërtimit të rrugëve të aksesit brenda prone, me subjekt zhvillues shoqërinë 'Zvërnec South Adriatic Development'”.

Kush po e shkatërron Pishë-Poron?

Nga Sazani në Pishë-Poro!

Pas projektit "të famshëm” të dhëndrit dhe vajzës së Presidentit Trump për resortin shumëmiliardësh në Sazan, kantieri zhvendoset në Pishë-Poro – Nartë, ku ka marrë leje për ndërtime hotelesh turistike një kompani e quajtur “Zvërnec South Adriatic Development”. Sipas mediave, pas kësaj kompanie qëndrojnë dy shtetas të huaj, një holandez dhe një shtetase bullgare. “Reporter” njofton se kompania “Zvërnec South Adriatic Development” zotërohet përmes disa kompanish guackë nga kompania offshore “Dutch Trust Management BV”, e cila rezulton sipas dokumenteve në QKB e regjistruar në emër të 5 aksionerëve anonimë me shtetësi shqiptare.

Ministria e Mjedisit thotë se Pishë-Poro është Zonë e Mbrojtur e kategorisë 5 dhe sipas ligjit, aty mund të ndërtohen projekte turistike.

Kush po e shkatërron Pishë-Poron?

Padyshim, shkatërrimet në mjedis bëhen të gjitha me VKM dhe me ligj dhe kur ligji është pengesë, ai ndryshohet. Por, përse gjithë kjo makineri kompanish “guacka” për të fshehur pronësinë e vërtetë mbi projektin?

Përse mbahen anonime kompanitë dhe kuptohet, sipërmarrësit, që fshihen pas projektit?

Për çfarë arsyeje/qëllimi kryhen punime në Pishë-Poro, për projektin e Zvërnecit?

A po përdoret projekti i Kushnerit në Sazan, si justifikim për t’iu sulur zonës bregdetrare të mbrojtur në Pishë-Poro?

Këto pyejte meritojnë përgjigje. Transparenca është detyrim.

BE është duke mbështetur disa projekte që kanë në fokus monitorimin e Zonave të Mbrojtura, pikërisht në raport me ligjin e ri (të ndryshuar, për t'u hapur rrugë ndërtimeve).

Kush po e shkatërron Pishë-Poron?

“PAMANCA – Zonat e Mbrojtura kanë Rëndësi – Avokim për Ruajtjen e Natyrës në Shqipëri”, zbatuar nga “Eco Albania”, "Respublika” dhe “FML”, – është njëri prej tyre, i cili i bashkohet zërit reagues të qytetarëve dhe komunitetit të shoqërisë civile mjedisore.

Nuk mjaftojnë as ligjet dhe as lejet për të shkatërruar mjedisin!

Ai park është krijuar në mënyrë artificiale. Ai është barrierë e sulmit të detit mbi tokën dhe shkatërrimi është fatal për florën, faunën dhe mbrojtjen prej erozionit detar./ CNA