A është rrëzuar sot Rama?

30 Janar 2023, 08:18, Opinione Ylli Dylgjeri

Rama sot është një kufomë e pa kallur. Ai me qeverisjen e tij në këto vite kapi rekordet më të zeza në ekonomi, bujqësi, financa, papunësi, siguri kombëtare, diplomaci, emigracion e kudo ku stampohet në kokë shkresa: Republika e Shqipërisë.

Ai me skandalin e fundit FBI ka humbur sot përfundimisht edhe median ndërkombëtare. Pyetja e ndërkombëtarëve sot është: Sa e thellë është kjo vrimë lepuri?

Rama, skandal pas skandali, është i zhytur në llumin e korrupsionit bashkë me lepujt e tij.

Sot për ti dhënë dorën e fundit largimit të tij, nevojitet t’i mbështesim gazetarët e guximshëm në media që thonë të vërtetën.

Tanxhentet, kompromentimet, klientelizmi, banditizmi, lorencizimi dhe batonizimi i shtypit janë gangrenat që po përjeton shoqëria.

Në fushëbetejen me Ramën dhe marionetat e tij në fakt janë vetëm të blerët.

Pjesa tjetër e gazetarëve po mbijeton me shpirt ndër dhëmbë.

Përtej fuqisë se fjalës në bisedat e lira e konfidente, në terrenin mediatik eshtë emergjente demaskimi, dhe publikimi i bëmave të tij, terren ky, ku Rilindja e ka mbuluar përmes mbylljes së informimit.

Shikoni si e kanë centralizuar zëdhënien. Del vetëm ai në media, duke izoluar çdo zyrë e marrëdhëniesh publike në institucionet e vendit. Nëpunësit e administratës bëjnë vetem like.

Rama nuk pranon ngritjen e Komisionit Hetimor në Kuvend për skandalin me Shefin e Kundërzbulimit të FBI, po i bllokon institucionet si opozita proruse e serbe në Mal të Zi.

Sot është koha, që kjo epërsi që po fitohet me shpërthimin e skandaleve duhet sfiduar kudo me të vërtetën që vjen.

Pra lufta për të fituar hapësira, publike e qëndrestare realizohet duke transmetuar informacionin e nëndheshëm, tenderat sekret, koncesionet, PPP, dhe të gjithë grabitjet e regjimit mafioz. Të tjera dashnore qeveritarësh do të dalin të kapin lekë e të divorcojnë gratë zyrtare.

Sepse hapësira mediatike e Ramës është kthyer sot në parodi groteske të modelit të kohës komuniste. Në vitet e fundit të sistemit komunist shumica e njerëzve dinin se po ushqehen me gënjeshtra).

Nisma e rinisë që regjimi injektoi në fund të viteve 90 ishte "Si është rinia sot, është atdheu nesër"...

Vitet rrodhën dhe ja ku është sot rinia, në emigracion, në papunësi, në klube nate, në vese, në droge, në krim, në errësira e poshtë pallateve, paçka se televizionet dhe një pjesë e portaleve janë krejtësisht të kapura nga propaganda e Ramës dhe Velisë.

Edhe pse po përjetojmë këtë situatë të mjerë, mijëra njerëz ushqehen sërish me dietën e përditshme të idhtarëve të Ramës se “Opozita është e vjetër", "Udhëheqësit janë të konsumuar ne 30 vite”paçka se vetë Rama ka 22 vjet në drejtim.

Kjo frymë mbështetet edhe nga sondazhet e blera, me "profesionistët e tyre". Sërish shifrat dalin të ekuilibruara, "e majta" përsëri krenohet se gjallon me shumicën e pa tundshme ". Erion Veliaj në krye...të plehut Sharrë!

Po si po ja dalin ende?

Paratë e zeza dalin lumë në ditët e zeza. Blihet vota.

Konsensusi i gjerë i oligarkëve e ndërtuesve ende mbështet Ramën dhe fushatën e tij të mjerë për në zgjedhjet vendore.

Edhe pse Rilindja e ka bërë rrëmujë administraten dhe shtetin po e ekulibron betejën e propagandës me mercenarët e saj mediatik në banaqe.

Një pakicë e gazetarëve të guximshëm po përpiqen ta bëjnë ndryshimin, duke publikuar lajme të pavarura duke zbuluar skandale, duke u përballur dhe bërë të besueshëm për audiencën e papunë.

Nuk është punë e lehtë kjo. Ata janë të bllokuar, të ndaluar, të ngacmuar dhe të anatemuar nga regjimi. Gjykohen edhe si agjentë të Berishës.

Qëllimi ynë sot është të ruajmë shtypin e lirë e të vërtetën e pavarur.

Ky është mision.