E fundit!

15:40 Aktualitet

Të premten, mbledhja e Grupit të PS-së dhe kabinetit/ Zbardhet agjenda e takimit

Kryeministri Edi Rama do të mbledhë ditën e premte Grupin ...

A janë të vërtetë alienët?

11 Prill 2023, 08:33, Kuriozitete Stephanie Pappas

Foto ilustruese

Aktualisht nuk ka asnjë provë për ekzistencën e jetës në planetët e tjerë. Por Universi është një vend i madh, dhe duket e pamundur që nga triliona planetë që supozohet se ekzistojnë në Universin tonë 13.8 miliardë vjeçar, vetëm Toka të jetë e banueshme nga qenie të gjalla. Hendeku midis pafundësisë së universit dhe mungesës së provave për jetën aliene njihet edhe si Paradoksi Fermi.

Kështu, kërkimi për jashtëtokësorët është një punë serioze, dhe shkencëtarët po bëhen gjithnjë e më të zgjuar se si ta kërkojnë atë. Përpjekjet e para për kërkimin e jetës jashtëtokësore, nisën shumë kohë përpara se njerëzit të kishin kapacitetin për t’u larguar nga planeti ynë. Sipas Institutit të Kërkimit për Inteligjencën Jashtëtokësore (SETI), shpikja e radios krijoi hapësirë për idenë e gjurmimit të transmetimeve nga botët e tjera.

Dhe në fillim të viteve 1900, shpikësit Nikola Tesla dhe Guglielmo Markoni besonin se mund të merrnin sinjale nga Marsi. Kërkimi i parë serioz për jetën jashtëtokësore nisi në vitin 1960. Ai u organizua nga astronomi Frenk Drejk, i cili përdori dy teleskopë që bazoheshin te valët radiofonike për të kërkuar sinjale nga planetët, të cilët mund të rrotullohen rreth yjeve me largësi 10-12 vite dritë larg nga Toka.

Por siç u pa Projekti Ozma nuk solli ndonjë gjë të re. As Projekti Feniks, një përpjekje private e Institutit SETI, që u zbatua në vitet 1995-2000, dhe që kërkoi 800 sisteme yjesh brenda 200 vite dritë nga Toka.

Një përpjekje e ngjashme vazhdon sot me teleskopin Alen, që përbëhet nga një grup prej 42 antenash, të cilat mund të përshtaten me frekuencat e mikrovalëve që vijnë nga e gjithë hapësirë e asaj pjese të Universit që njihet si Rruga e Qumështit.

Po ashtu, Instituti SETI ka nisur një përpjekje për të zbuluar pulsorët lazer që alienët inteligjentë që ndodhën shumë larg nga ne mund të kenë dërguar si mesazhe në kozmos. Sigurisht, këto përpjekje presupozojnë gjetjen e specieve aliene shumë të avancuara në aspektin teknologjik.

Ndërkaq shkencëtarët janë në kërkim të formave më të thjeshta të jetës, dhe përparimet në ndërtimin e anijeve kozmike pa ekuipazh dhe në teknologjitë e sensorëve në distancë, po i lejojnë ata që të kërkojnë për molekulat, që mund të na tregojnë se atje tej ka diçka të gjallë.

Teleskopët e ndjeshëm, si teleskopi hapësinor “James Webb”, mund të kapin ndryshime shumë të vogla në dritën që vjen nga ekzoplanetët e largët. Kjo i lejon studiuesit që të zbulojnë oksigjen, squfur ose gazra të tjerë, të cilat mund të tregojnë se në ata planetë janë aktive mikrobet.

Përpjekjet e fundit mund të kenë zbuluar fushën e parë magnetike rreth një planeti të largët të ngjashëm me Tokën, një parakusht që jeta t’i mbijetojë rrezatimit të ashpër të yjeve aty pranë. Në sistemin tonë diellor, robotë si “Mars Perseverance” po mbledhin mostra në kërkim të fosileve ose molekulave, të cilat mund të sugjerojnë se jeta mikrobike lulëzoi në Planetin e Kuq miliarda vjet më parë, kur ishte më i ngrohtë dhe më i lagësht.

Studiuesit po studiojnë mjedise ekstreme, si shkretëtirat e Kilit dhe thellësitë e mëdha të oqeaneve, për të ndihmuar në orientimin e duhur të këtij kërkimi. Gjuetia për jetën jashtëtokësore është e gjatë, por shkencëtarët janë optimistë se metodat e reja do të zbulojnë se ne nuk jemi të vetmet qenie të gjalla në Univers./ Përshtatur nga CNA.al