E fundit!

12:20 Aktualitet

EKSKLUZIVE/ Ja kandidatët për postin e nëndrejtorit në Policinë e Shtetit

CNA ka zbuluar ekskluzivisht se cilët do të jenë kandidatë...

Foto nga viti 1921/ Ekspozitë e albumit unik të mikut të madh zviceran të Shqipërisë, Eugène Pittard

22 Tetor 2025, 16:02, Kulturë CNA

Foto nga viti 1921/ Ekspozitë e albumit unik të mikut të madh

Një koleksion fotografish që datojnë nga viti 1921 po ekspozohen në kryeqytet, në datat 21 tetor-9 nëntor.

Ambasada e Zvicrës ka hapur një ekspozitë në Qendrën për Hapje dhe Dialog që përbëhet nga një album me fotografi unike të bëra nga akademiku zviceran Eugene Pittard gjatë udhëtimeve të tij nëpër Shqipëri rreth 100 vite më parë.

Ekspozita përmban foto të pabotuara më parë.

“Po rizbulojmë historinë e patreguar të punës dhe kontributit të këtij akademiku të njohur zviceran. Imazhet që ai kapi nuk janë thjesht regjistrime të kohës dhe vendit; ato janë shprehje admirimi dhe respekti. Përmes këtyre fotografive mund ta shohim Shqipërinë ashtu siç e shihte Pittard: një vend me bukuri mahnitëse, thellësi kulturore dhe humanizëm”,-tha Ambasadorja zvicerane Ruth Huber.

Foto nga viti 1921/ Ekspozitë e albumit unik të mikut të madh

Eugene Pittard ishte një kontribues i madh për Shqipërinë. Fotot e tij tregojnë një pamje të jashtëzakonshme të vendit dhe njerëzve në vitet 1921 dhe 1924. Në vitin e brishtë 1921, Eugene dhe Helene Pittard vizituan Shqipërinë për herë të dytë, duke udhëtuar nëpër vend me kamerën e tyre dhe duke kapur në celuloid jetën e përditshme, qytetet në rritje dhe peizazhet e paprekura.

“Si një kronist i palodhur që i ra kryq e tërthor Shqipërisë, ai ishte njëkohësisht dhe një dëshmitar historik duke na lënë trashëgim imazhe që nuk gjenden në arkivat shqiptare dhe që sot përbëjnë referencë. Atij i interesonte fytyra shqiptare, njeriu, për të deshifruar diçka sociale: përkatësinë e tij dhe marrëdhënien me tokën e për më tepër me dramën që përjetonte një popull”,-tha botuesi dhe studiuesi Luan Rama.

“Pittard, me syrin e tij prej humanisti, i shikoi shqiptarët jo si objekte studimi të ftohtë, por si dëshmitarë të gjallë të një historie që meritonte të ruhej, të respektohej dhe të tregohej”,- shprehet kuratori i ekspozitës, Elton Koritari.

Foto nga viti 1921/ Ekspozitë e albumit unik të mikut të madh

Eugene Pittard u bë zëdhënësi ndërkombëtar i Shqipërisë në një kohë delikate. Ai loboi fuqishëm për të drejtat dhe sovranitetin e vendit dhe luajti një rol jetësor në pranimin e Shqipërisë në Lidhjen e Kombeve në vitin 1920. Broshura e tij më e famshme 'Pour L'Albanie' e botuar në të përditshmen e Gjenevës 'La Suisse' paraqet gjendjen reale të vendit në atë periudhë, ofron argumente dhe bën thirrje për njohjen e sovranitetit të Shqipërisë. Pittard është gjithashtu themeluesi i Kryqit të Kuq Shqiptar./CNA