Të shtëna në ajër dhe shoqërime në komisariat/ Çfarë ndodhi në Kavajë?

25 Shkurt 2026, 21:16, Kronika CNA

Të shtëna në ajër dhe shoqërime në komisariat/

Një 38-vjeçar, i cili kishte thyer masën e sigurisë ”arrest në shtëpi”, është shoqëruar në komisariat.

Bashkë me 38-vjeçarin, janë shoqëruar dhe kunati dhe disa familjarë të tij. Këta të fundit janë shoqëruar për shkak se bashkë me shtetasin A.B., kanë kundërshtuar urdhërat e policisë.

Gjatë mosbindjes së tyre, një nga efektivët ka qëlluar në ajër me armë zjarri me qëllim që ata zbrapsenin. Lidhur me rastin është vënë në dijeni edhe Agjencia e Mbikëqyrjes Policore.

Njoftimi i policisë:

Kavajë / Informacion paraprak

Rreth orës 19:10, Patrulla e Përgjithshme e Postës së Policisë Golem, bashkë me Ndihmësspecialistin e zonës që ishte i gatshëm, gjatë patrullimit në territor, në Golem, kanë konstatuar në rrugë shtetasin A. B., 38 vjeç, i cili ishte i shoqëruar me persona të tjerë, dhe e kanë ndaluar për verifikim, pasi njihej nga Policia që ishte me masë sigurie “Arrest në shtëpi” për veprën penale “Shkatërrimi i pronës me zjarr”.

Punonjësit e Policisë, gjatë verifikimit, i kanë kërkuar arsyen e thyerjes së masës së sigurisë dhe i kanë komunikuar se do të shoqërohej në ambientet e Komisariatit të Policisë Kavajë për veprime të mëtejshme.

Shtetasi A. B. dhe kunati i tij, shtetasi A. Sh., 23 vjeç, kanë kundërshtuar me forcë shërbimet e Policisë, të ndihmuar edhe nga persona të tjerë, familjarë të tij.

Punonjësi i Policisë me detyrë Ndihmësspecialist në Postën e Policisë Golem ka qëlluar me armën e shërbimit, pistoletë, një herë në ajër, me qëllim zbrapsjen e tyre.

Në ndihmë të punonjësve të Policisë kanë shkuar shërbime të tjera policore, të cilat kanë bërë shoqërimin e shtetasve të përfshirë në kundërshtim të veprimeve të Policisë.

Gjithashtu, është shoqëruar në Komisariat edhe shtetasi A. B., i cili kishte thyer masën e sigurisë.

Veprimet hetimore për këtë rast po kryhen nga Oficeri i Policisë Gjyqësore i Prokurorisë së Juridiksionit të Përgjithshëm Durrës.

Ndërkohë, është njoftuar edhe Agjencia e Mbikëqyrjes Policore për rastin. /CNA