Kupola e policisë e kriminalizuar/ Pse Ilir Proda nuk mban përgjegjësi?

3 Mars 2025, 19:46, Kronika CNA

Kupola e policisë e kriminalizuar/ Pse Ilir Proda nuk mban

Gjykata e Posaçme la në burg këtë të hënë 3 efektivë të policisë të arrestuar gjatë një operacioni në fundjavë që goditi 2 grupe kriminale. Në burg janë lënë dy shefat e krimeve, ai i Himarës Shkëlzen Ruska dhe i Lushnjës, Ervis Alisinanaj.

Po ashtu edhe ish-efektivi Erdit Hazizaj. Në kërkim ndërkaq është shpallur shefi i policisë kufitare në Sarandë, Elvis Dervishi. Ata akuzohen nga SPAK për kultivim të kanabisit, duke qenë pjesë aktive e grupeve kriminale, ndërsa janë kapur në komunikime në Sky ECC.

Por kush janë efektivët të cilët ndodhen sot pas hekurave?

Elvis Dervishi është emëruar, në 18 gusht 2024, shef i Komisariatit të Policisë Kufitare në Sarandë. Dervishi është transferuar në Sarandë pas detyrës së mëparshme në Drejtorinë e Përgjithshme të Policisë së Shtetit.
Ervis Alisinanaj së fundi mbante postin e Shefit të Krimeve në Komisariatin e Lushnjës. Alisinanaj më herët ka qënë pjesë e policisë kufitare të Vlorës.

Ai ka mbajtur detyrën e specialistit pranë këtij Sektori. Alisinanaj është shkarkuar më pas nga ky post më 2 gusht të vitit 2022 nga ish-kreu i policisë Gledis Nano, për shkak të tragjedisë së ndodhur në Potam ku humbi jetën një vajzë 7-vjeçare.
Erdit Hazizaj nuk është më efektiv që prej vitit 2022, ndërsa ka qenë pjesë e Forcave Operacionale.

Në burg është lënë edhe Shkëlzen Ruska, shef i krimeve i Himarës. Ky i fundit ashtu si Erdit Hazizaj, Evis Alisinanaj dhe Elvis Dervishi informonin trafikantët për lëvizjet e policisë.

Pra 4 efektivë policie, mes tyre 3 ende në detyre me poste të larta në kupolën e policisë, bashkëpunonin me trafikantë narkotikësh.

Kreu i Policisë, Ilir Proda së bashku me ministrin e Brendshëm Ervin Hoxha bënë rrokadë në polici, ndërsa u hap edhe një garë për 12 drejtora policie në qarqe dhe 48 shefa komisariatesh, në vitin që lamë pas. Proda tha se nga ky proces do të përmirësohej imazhi i Policisë, do të rriteshin parametrat e sigurisë dhe do të arrinin rezultate më të larta në luftën kundër krimit.
Nga ana tjetër, SPAK çdo ditë e më shumë teksa zbardh bisedat në SKY, zbulon nga efektivët më të thjeshtë e deri tek shefat e policisë, të lidhur me grupet kriminale.

Shumë efektivë të frikësuar nga grupet kriminale vendosin t’u nënshtrohen këtyre të fundit dhe shpesh zgjedhin në formë vullnetare të bashkëpunojnë me to. Pyetja që lind është se a ndjen kryepolici Ilir Proda ndonjë përgjegjësi morale dhe ligjore për kriminalizimin e Policisë së Shtetit dhe gjunjëzimin e saj para krimit? Ku janë institucionet ligjzbatuese, qoftë edhe brenda Policisë së Shtetit që duhet të kontrollojnë efektivët e policisë? Çdo ditë dhe më shumë shtohen efektivët e inkriminuar, duke njollosur edhe ata policë të ndershëm që mundohen të kryejnë detyrën e tyre me devotshmëri.

Nëse krimi ngre dorë dhe kupola e policisë nuk ka forcë ta ndalë, por vendos të bashkëpunojë me të, sa i fortë mund të jetë qytetari i thjeshtë dhe i pambrojtur përballë revanshit të krimit?!/ CNA