web counter
LEXO PA REKLAMA!

SHKARKO APP

App Store
Google Play

E fundit!

x

Vjosa Osmani, me tone të forta në parlament/ "Bandat kriminale të Serbisë nuk mund të pengojnë qytetarët e veriut të jetojnë të lirë"

15 Dhjetor 2022, 10:51, Kosova & Bota CNA
Vjosa Osmani, me tone të forta në parlament/ "Bandat kriminale
Presidentja e Kosovës, Vjosa Osman

Presidentja e Kosovës, Vjosa Osmani, ka mbajtur sot fjalimin e saj vjetor para deputetëve të Kuvendit.

Ajo shprehet se vit pas viti është kërkuar që shteti dhe ligji t'u shërbejnë të gjithëve dhe jo vetëm disa personave të caktuar.


“Sundimi i ligjit është esencial për funksionimin e çdo shtylle të shtetit. Në fakt është parakusht për një gjë të tillë. Por, siç e dini, të nderuar deputetë, veriu i Kosovës vazhdon të jetë sfidë për shkak të pretendimeve territoriale që Serbia ka ndaj Kosovës e të cilat i shpreh nëpërmjet financimit dhe përkrahjes së strukturave ilegale kriminale. Por, ne jemi të vendosur që të krijojmë siguri e sundim të ligjit në çdo cep të territorit të vendit tonë. Bandat kriminale nuk mund ta mbisundojnë dëshirën e qytetarëve tanë në veri për të jetuar të lirë në atdheun e tyre, në Kosovë”, ka theksuar presidentja Osmani.

Më tej presidentja shprehet se në fakt bandave kriminale nuk u pëlqen aspak vendosmëria e institucioneve, ku të gjithë qytetarët trajtohen në mënyrë të barabartë para ligjit dhe as zbatimi i ligjit në gjithë territorin e vendit.


“Mirëpo le ta kenë të qartë, kjo është rrugë nga e cila nuk devijojmë e nga e cila nuk heqim dorë. Ata do të përballen me drejtësi për veprat penale kundër rendit kushtetues të Republikës së Kosovës, si dhe për frikësimin e kërcënimet që po ua bëjnë qytetarëve tanë në veri”, ka theksuar ajo.

“Jemi të gjithë dëshmitarë të kërcënimit të vazhdueshëm të Serbisë ndaj Kosovës. Ky kërcënim me përmasa agresioni së fundi është shpërfaqur nëpërmjet idesë hegjemoniste të vendosjes së trupave ushtarake të Serbisë në Kosovë. Por, Serbia dhe udhëheqësi i saj Vuçiç e dinë fare mirë se prezenca e ushtrisë serbe në territorin e Kosovës mori fund më 12 qershor 1999. Më 1999, kur trupat e NATO-s thyen boshtin kurrizor të idesë hegjemoniste te Serbisë për një Kosovë pa shqiptarë ku shfarosja ishte qëllimi gjenocidal i Millosheviqit”, ka thënë ajo.

Në mbyllje të fjalimit të saj, presidentja Vjosa Osmani, ka falënderuar policinë e Kosovës, duke thënë se pavarësisht sfidave është për t'u vlerësuar fakti se efektivët kujdesen për jetën e qytetarëve.

Gjithashtu ajo falënderoi të gjithë zyrtarët e tjerë të sigurisë dhe inteligjencës për punën e tyre në mbrojtje të interesave të vendit.

“Puna e institucioneve të Kosovës për vendosjen e rendit dhe ligjit në veriun e vendit është edhe përpjekje për mbrojtjen e serbëve lokalë nga strukturat ilegale të organizuara në banda kriminale dhe të cilat kanë për synim presionin, frikësimin dhe kërcënimin e tyre. Kosova është një dhe e tërë, atdhe i të gjithëve, pra edhe i qytetarëve të komunitetit serb, siç është dhe i të gjitha komuniteteve të tjera, ndaj e kemi obligim kushtetues të kujdesemi për ta nga veriu në jug, nga lindja në perëndim të Kosovës”, ka theksuar Osmani./ CNA.al





Lajmet e fundit nga