E fundit!

22:46 Aktualitet

Pas ndeshjes, protestuesit zhvendosen te selia e PD-së: Opozitë e shitur

Pas ndeshjes, protestuesit janë zhvendosur para selisë së ...

Turqia dyfishon eksportin me Kosovën

17 Qershor 2023, 14:12, Kosova & Bota CNA

Foto ilustruese

Turqia ka dyfishuar eksportin e mallrave me Kosovën.

Kjo bëhet e ditur nga të dhënat e Agjencisë së Statistikave të Kosovës.

Sipas të dhënave, gjatë vitit 2022 dhe në 4 muajt e parë të këtij vitit, Turqia ka qenë partneri kryesor tregtar i Kosovës.

Ky dyfishim i eksportit vjen si rezultat i marrëveshjes tregtare Kosovë-Turqi për heqjen e tarifave doganore për një numër të madh të produkteve, kryesisht industriale.

Në dhjetë vjetët e fundit, Kosova ka importuar mallra nga Turqia në vlerë rreth 4.5 miliardë euro, ndërsa Kosova, për të njëjtën periudhë kohore, ka eksportuar në drejtim të shtetit turk rreth 120 milionë euro mallra.

Dhoma e Tregtisë, Industrisë në Kosovë (DHTIK) dhe Oda Ekonomikë e Kosovës deklarojnë se sa herë rritet importi, prodhuesi vendor nuk favorizohet. Për këtë arsye, ata thonë se duhet t’i jepet prioritet shtimit të prodhimit në Kosovë.

“Problemi është se në momentin që rritet importi nga cilido vend, atëherë kjo nuk e ndihmon produktin vendor. Në përgjithësi importi më i madh nëse nuk është ndërruar kërkesa në treg, atëherë importi ka fituar në raport me produktin vendor. Si shtet duhet të vijmë me politika më të mira të subvencionimit të produkteve vendore, mirëpo edhe të subvencionimit të eksportit, sepse kemi një numër të produkteve të cilat eksportohen jashtë shtetit, mirëpo të vetmen politikë favorizuese që ia bëjmë është zbritjet në taksa, në TVSH për eksport, gjë që nuk është aspak e mjaftueshme... Sikur shtetet e tjera duhet që shteti të jap edhe subvencionet për bizneset që eksportojnë e posaçërisht ato që e rritin prodhimin edhe punësimin vendor”, shprehet Zana Beqiri, drejtoresha e DHTIK.

Ndërkohë, kujtojmë se marrëveshja tregtare Kosovë-Turqi për heqjen e tarifave doganore është nënshkruar në vitin 2013 nga ish-ministrja e Tregtisë dhe Industrisë e Kosovës, Mimoza Kusari – Lila, dhe ish-ministri turk i Ekonomisë, Zafer Gjaglajan. Kjo marrëveshje u aprovua nga Turqia në vitin 2015, por në fuqi hyri në vitin 2019./ CNA.al