E fundit!

11:34 Aktualitet

Mungesa e Hitës në komision acaron opozitën: Nëse nuk është i zoti të largohet

Kreu i Policisë së Shtetit Skënder Hita nuk është paraqitu...

Suedia: Irani u dërgoi mesazhe suedezëve duke i nxitur për hakmarrje për djegien e Kuranit

24 Shtator 2024, 14:31, Kosova & Bota CNA

Suedia: Irani u dërgoi mesazhe suedezëve duke i nxitur për

Suedia thotë se Irani është përgjegjës për mijëra mesazhe me shkrim që u ishin dërguar njerëzve në vendin skandinav, në të cilët bëhej thirrje për hakmarrje ndaj atyre që e digjnin librin e shenjtë të myslimanëve, Kuranin, në vitin 2023.

Autoritetet në Stokholm pretendojnë se Garda Revolucionare e Iranit “e theu bazën e të dhënave” dhe ia doli t’i dërgojë “rreth 15.000 mesazhe në suedisht” gjatë kohës kur ndodhi një valë e djegieve të Kuranit.

Prokurori i lartë Mats Ljungqvist tha se një hetim fillestar, i kryer nga agjencia suedeze e sigurisë SAPO, gjeti se “ishte shteti iranian ai që, përmes Gardës Revolucionare Islamike, IRGC, e theu bazën e të dhënave të një kompanie suedeze që kryen shërbime të SMS-ve”.

Emri i kompanisë suedeze për dërgimin e mesazheve me shkrim nuk u bë i ditur.

Autoritetet iraniane nuk i kanë komentuar deri tani akuzat e bëra nga Suedia.

Në gusht 2023, mediat suedeze raportuan se një numër i madh njerëzish në Suedi kishin pranuar mesazhe me shkrim në gjuhen suedeze, në të cilat bëhej thirrje për hakmarrje ndaj njerëzve që po e digjnin Kuranin, tha Ljungqvist.

Ai tha se dërguesi i mesazheve ishte “një grup që quhej ekipi Anzu”.

Djegiet e Kuranit u lejuan bazuar në nenin për liri të shprehjes, e cila është e mbrojtur me Kushtetutën e Suedisë. Policia kishte dhënë leje për to.

Megjithatë, këto incidente e ndanë Suedinë mes përkushtimit ndaj lirisë së shprehjes dhe ndaj respektimit të pakicave fetare.

Në një deklaratë të ndarë, menaxheri operacional i SAPO-s, Fredrik Hallstrom, tha se qëllimi i mesazheve ishte gjithashtu “që Suedia të përshkruhej si një vend islamofobik dhe të shkaktoheshin përçarje në shoqëri”.

Nuk ka ligj në Suedi që në mënyrë të qartë e ndalon djegien apo përdhosjen e Kuranit, apo ndonjë libri tjetër fetar. Si shumë vende perëndimore, as Suedia nuk ka ligj për blasfeminë./ REL