web counter
LEXO PA REKLAMA!

SHKARKO APP

App Store
Google Play

E fundit!

x

Putini i quan të “papranueshme” kritikat e Makronit për tensionet Armeni-Azerbajxhan

14 Tetor 2022, 14:41, Kosova & Bota CNA

Putini i quan të “papranueshme” kritikat e Makronit për

Presidenti i Rusisë, Vladimir Putin, më 14 tetor hodhi poshtë deklaratat e homologut të tij francez, Emanuel Makron, se Moska po destabilizon procesin e paqes midis Armenisë dhe Azerbajxhanit.

Bakuja dhe Jerevani janë në konflikt për më shumë se tri dekada lidhur me rajonin e shkëputur të Nagorno-Karabakut. Kjo pasi, separatistët e mbështetur nga Armenia morën kontrollin e rajonit që banohet kryesisht nga armenët.

Makron, gjatë një interviste për televizionin "France 2", akuzoi Moskën se qëllimshëm ka provokuar përleshjet e fundit midis Armenisë dhe Azerbajxhanit. Lideri francez tha se provokimet janë pjesë e përpjekjeve për të destabilizuar këtë rajon të brishtë.

“Besoj se këto deklarata tregojnë mungesë të kuptimit të kursit të konfliktit”, tha Putini gjatë takimit me liderët e shteteve të rajonit, që po mbahet në Kazakistan.

Putini shtoi se deklaratat e Makronit “tingëllojnë të pasakta, mund të them edhe perverse, prandaj ato janë të papranueshme”.

Më 13 tetor, zëdhënësja e Ministrisë së Jashtme ruse, Maria Zakharova, tha se deklaratat e Makronit ishin “absolutisht të papranueshme”.

Javën e kaluar, Makron së bashku me presidentin e Këshillit Europian, Charles Michel, u takuan me presidentin e Azerbajxhanit, Ilham Aliyev, dhe kryeministrin e Armenisë, Nikol Pashinian.

Të dyja shtetet zhvilluan një luftë gjashtëjavore më 2020-ën, dhe më pas Rusia ndërmjetësoi një marrëveshje armëpushimi, që rezultoi me humbjen e kontrollit të disa pjesëve të rajonit të Nagorno-Karabakut nga Armenia.

Sipas marrëveshjes së armëpushimit, Moska ka dislokuar rreth 2.000 trupa në rajon, si pjesë e forcave paqeruajtëse.

Në takimin midis Aliyevit dhe Pashinianit, që u zhvillua në Pragë, autoritetet europiane thanë se liderët u pajtuan që një mision civil i BE-së të vendosej në kufirin mes shteteve. Në kufi, mbi 200 persona u vranë në luftimet mes Armenisë dhe Azerbajxhanit që shpërthyen disa javë më parë./REL





Lajmet e fundit nga