web counter
LEXO PA REKLAMA!

SHKARKO APP

App Store
Google Play

E fundit!

x

Protestë kundër kthimit në rigjykim të lëndës për vrasjen e Marigona Osmanit

28 Shkurt 2024, 14:55, Kosova & Bota CNA

Protestë kundër kthimit në rigjykim të lëndës

Pjesëtarë të Kolektivit për Mendim dhe Veprim Feminist kanë protestuar të mërkurën para Pallatit të Drejtësisë në Prishtinë kundër vendimit të Gjykatës së Apelit, për të dërguar në rigjykim lëndën e vrasjes së Marigona Osmanit.

Bjeshkë Guri, përfaqësuese e organizatës, ka thënë se janë mbledhur para Gjykatës së Apelit për të “kundërshtuar praktikat e sistemit të drejtësisë në Kosovë, i cili është duke na vërtetuar çdo herë e më shumë se nuk është duke funksionuar për gratë, duke ua pamundësuar çfarëdo lloj drejtësie”.

Ajo ka thënë se vendimi i gjykatës për rastin e Osmanit ka shkaktuar “revoltim tej mase”, dhe rrezikon sigurinë e grave dhe vajzave në Kosovë.

“Nuk mund të lejojmë që rasti i Marigonës të zvarritet në ndërtesat e gjykatave dhe eventualisht t’ua thellojë edhe më tej dhimbjen familjarëve të saj”, ka thënë ajo. Në gusht të vitit 2023, Dardan Krivaqa është dënuar me burgim të përjetshëm për vrasjen e Osmanit, ndërsa Arbër Sejdiu është dënuar me 15 vjet burgim për ndihmë në kryerjen e veprës “vrasje e rëndë”.

Pjesëmarrësit në protestë janë parë duke mbajtur mbishkrimet “Ne nuk harrojmë”, “Drejtësi për Marigonën”, “Siguri dhe drejtësi për gratë” e tjera.

Më 23 shkurt, Apeli e ka miratuar ankesat e avokatëve mbrojtës për aktgjykimin, me arsyetimin se ka pasur shkelje procedurale gjatë gjykimit.

Të akuzuarit do të vazhdojnë të qëndrojnë në paraburgim.

Marigona Osmani ka qenë 18-vjeçare kur është vrarë, më 22 gusht të vitit 2021, në banesën e të akuzuarit kryesor, Dardan Krivaqa, në qytetin e Ferizajt. Krivaqa e Sejdiu, e kanë dërguar trupin e pajetë të viktimës në spitalin e qytetit, dhe më pas janë larguar në drejtim të panjohur.

Sipas aktakuzës, Krivaqa, më 21 gusht 2021, rreth orës 10:14, në banesën e tij, pa pëlqimin e tani të ndjerës Marigona Osmani, e ka detyruar atë të kryente marrëdhënie seksuale dhe e kishte abuzuar e maltretuar në forma të ndryshme.

Sipas aktakuzës, një ditë më pas, më 22 gusht 2021, Krivaqa dhe Sejdiu e kanë vrarë të ndjerën në përpjekje për të fshehur veprën penale të dhunimit.

Ata janë akuzuar edhe për kryeje të dhunimit, por janë shpallur të pafajshëm në këtë pikë, në mungesë provash./ Rel





Lajmet e fundit nga