"Nuk shqetësohem për mosmarrëveshjet"/ Rutte: SHBA-të janë absolutisht të përkushtuara ndaj NATO-s

12 Shkurt 2026, 22:43, Kosova & Bota CNA

"Nuk shqetësohem për mosmarrëveshjet"/ Rutte:

Shefi i NATO-s, Mark Rutte u shpreh i kënaqur me diskutimet e zhvilluara sot në Bruksel në kuadër të takimit të Ministrave të Mbrojtjes të Aleancës. Rutte tha se diskutimet u përqendruan në forcimin e parandalimit dhe mbrojtjes, si dhe në sigurimin e mbështetjes së vazhdueshme për Ukrainën.

Ai shprehu kënaqësinë për zbatimin e angazhimeve të anëtarëve të Aleancës për rritjen e shpenzimeve të mbrojtjes, duke thënë se zbatimi i vendimeve të marra qershorin e kaluar në Hagë tregon një ndryshim të vërtetë të mentalitetit, një unitet vizioni, një mbrojtje shumë më të fortë evropiane brenda NATO-s.

Lidhur me çështjen e Groenlandës dhe mosmarrëveshjet e shprehura brenda Aleancës, Rutte deklaroi se gjithmonë do të ketë diskutime dhe mosmarrëveshje brenda NATO-s.

“Do të ishte shumë e mërzitshme nëse nuk do të kishte. E kemi parë në të kaluarën. Nuk jam i shqetësuar për këtë", u shpreh ai.

Sekretari i Përgjithshëm i NATO-s u pyet vazhdimisht nga gazetarët gjatë konferencës për shtyp pas përfundimit të takimit të Ministrave të Mbrojtjes në lidhje me mungesën e Sekretarit të Luftës (Mbrojtjes) të SHBA-së, Pete Hegseth. Ai theksoi rëndësinë e ndërhyrjes së Elbridge Colby, Nënsekretarit të Luftës (Mbrojtjes) të SHBA-së, i cili mori pjesë në takim.

"Ajo që shihni sot është një NATO ndaj së cilës Shtetet e Bashkuara janë absolutisht të përkushtuara", tha Rutte,

Ai u pyet gjithashtu nëse NATO duhet të zhvillojë bisedime të drejtpërdrejta me Putinin, në përputhje me deklaratat e presidentit francez mbi një dialog të mundshëm të BE-së me Moskën.

"Presidenti Trump zhbllokoi negociatat e paqes me Presidentin Putin shkurtin e kaluar. E konsideroj absolutisht legjitime të zhvillojmë këtë diskutim, për sa kohë që evropianët - dhe jam i sigurt se do ta bëjnë këtë - janë plotësisht transparentë në lidhje me iniciativat e tyre, në mënyrë që gjithçka të funksionojë në një mënyrë të koordinuar. Sepse kemi një dhe të vetëm qëllim, t'i japim fund kësaj lufte në një mënyrë që Rusia të mos përpiqet kurrë të sulmojë përsëri Ukrainën", theksoi Rutte. /CNA