BE dhe Britania urojnë Kurtin për Qeverinë e re/ Përmendin dialogun me Serbinë dhe Planin e Rritjes

12 Shkurt 2026, 18:10, Kosova & Bota CNA

BE dhe Britania urojnë Kurtin për Qeverinë e re/ Përmendin

Kryediplomatja e Bashkimit Evropian, Kaja Kallas dhe ambasadori britanik në Kosovë, Jonathan Hargreaves e kanë uruar kryeministrin e Kosovës, Albin Kurti për formimin e Qeverisë së re të vendit.

Përmes një postimi në X – dikur Twitter – Kallas ka thënë se është krijuar momentum i ri për t’i avancuar marrëdhëniet mes Bashkimit Evropian dhe Kosovës si dhe dialogun mes Prishtinës dhe Beogradit, prandaj vetë ajo është e gatshme të organizojë së shpejti një takim të nivelit të lartë.

Mes tjerash, Kallas e ka përmendur edhe rëndësinë e kryerjes së reformave.

“Kjo është rruga më e shpejtë për t’ia hapur rrugën mbështetjes së Bashkimit Evropian në vlerë prej qindra miliona eurove dhe të ketë përparim në rrugën drejt BE-së”, ka thënë Kallas.

Kurtin e ka uruar edhe Komisionarja e BE-së për Zgjerim, Marta Kos, e cila gjithashtu e ka përmendur nevojën për reforma dhe përfitime nga Plani i Rritjes i BE-së për vendet e Ballkanit Perëndimor.

“Mezi pres ta vizitoj Kosovën shpejt”, ka thënë ajo përmes një postimi në X.

Ambasadori britanik ka thënë se Britania është e gatshme që ta ndihmojë Kosovën teksa çon përpara reforma, forcon institucionet demokratike dhe punon në interes të të gjitha komuniteteve.

“Mezi presim që të shohim përkushtimin e Kosovës për dialogun e ndërmjetësuar nga BE-ja dhe për nxitjen e stabilitetit, prosperitetit dhe bashkëpunimit rajonal”, ka thënë mes tjerash ambasadori Jonathan Hargreaves, përmes një postimi në Facebook.

Qeveria e re, në krye me Kurtin, i ka fituar votat e nevojshme më 11 shkurt, pas konstitutimit të Kuvendit të Kosovës.

Kurti me partinë e tij, Lëvizjen Vetëvendosje, ka fituar mbi 51 për qind të votave në zgjedhjet e parakohshme parlamentare të 28 dhjetorit, duke siguruar 57 ulëse në Kuvend.

Ndër prioritetet kryesore të Qeverisë në ditët e para është ratifikimi i marrëveshjeve ndërkombëtare që ka Kosova me BE-në dhe Bankën Botërore. Të gjitha së bashku kapin vlerën e rreth 1 miliard eurove. /REL