"Kurti 3" nis zyrtarisht punën/ Vendimet e rëndësishme që u miratuan në mbledhjen e parë të qeverisë

12 Shkurt 2026, 17:42, Kosova & Bota CNA

"Kurti 3" nis zyrtarisht punën/ Vendimet e rëndësishme

Qeveria e Kosovës ka zhvilluar sot mbledhjen e parë të kabinetit të ri, ku janë miratuar disa vendime të rëndësishme për vendin. Kryeministri Albin Kurti ka bërë me dije se në mbledhjen e qeverisë u miratua buxheti i vitit 2026 dhe lista e marrëveshjeve ndërkombëtare.

Më tej, ka njoftuar se u miratua dhe vendimi për t’i kërkuar Kuvendit që të mundësojë zgjatjen e Ligjit për Ndarje Buxhetore të vitit të kaluar edhe për muajin mars.

Sipas tij në këtë mënyrë pensionet dhe pagat në sektorin publik do të ndahen në kohë, teksa komisionet parlamentare dhe deputetët e legjislaturës së 10-të trajtojnë dhe miratojnë buxhetin për këtë vit. Kurti thekson se shërbimi ndaj qytetarëve të Kosovës është privilegji më i madh i secilit prej anëtarëve të kabinetit.

Postimi i plotë:

Mbledhja përuruese dhe e parë e punës së kabinetit të ri qeveritar. Që në ditën e parë të punës, u mblodhëm për të miratuar buxhetin e vitit 2026 dhe listën e marrëveshjeve ndërkombëtare, të cilat prej kohësh presin miratimin në Kuvend e që kanë edhe afat skadence. Gjithashtu, aprovuam vendimin për t’i kërkuar Kuvendit që të mundësojë zgjatjen e Ligjit për Ndarje Buxhetore të vitit të kaluar edhe për muajin mars, në mënyrë që të sigurohemi se pensionet dhe pagat në sektorin publik të ekzekutohen me kohë, teksa komisionet parlamentare dhe deputetët e legjislaturës së 10-të trajtojnë dhe miratojnë buxhetin për këtë vit.

Rikujtojmë se vitin e kaluar Kuvendi i Republikës u shpërnda pa u votuar buxheti i shtetit në vlerë prej 4 miliardë euro, Plani i Rritjes së Bashkimit Evropian në vlerë prej 882.6 milionë euro dhe tri marrëveshje me Bankën Botërore në vlerë mbi 120 milionë euro, duke rrezikuar madje përfitimet nga to. Tash që kemi Kuvend të konstituuar dhe Qeveri të re në krye të detyrës, e kemi edhe një mundësi tjetër për t’i ratifikuar këto marrëveshje ndërkombëtare në Kuvend.

Shërbimi ndaj Republikës dhe qytetarëve, me punë e zell, nder e përkushtim, është privilegji më i madh që do ta kemi secili prej nesh.