"Hapi i dytë", thirrje për marrëveshje në takimin e Ohrit, Kurti-Vuçiç

13 Mars 2023, 12:04, Kosova & Bota CNA

"Hapi i dytë", thirrje për marrëveshje në takimin

Autoritetet vendore dhe ndërkombëtare presin që në takimin e Ohrit, i cili mbahet më 18 mars ndërmjet kryeministrit të Kosovës, Albin Kurti dhe presidentit të Serbisë, Aleksandar Vuçiç, të arrihet ujdi për planin e zbatimit të propozimit europian. Edhe diplomatët perëndimorë që janë të përfshirë në dialogun Kosovë-Serbi, shpresojnë që të arrihet përparim në takimin e 18 marsit në Ohër të Maqedonisë së Veriut, para se kreu i politikës së jashtme të Bashkimit Europian, Josep Borrell të raportojë në Këshillin Europian për rrjedhën e dialogut.

"Mos e humbni autobusin"

Ambasadori gjerman në Prishtinë, Jörn Rohde, i dha përkrahje të plotë ndërmjetësuesit të dialogut, Miroslav Lajçak, në arritjen e një marrëveshjeje mes Kosovës dhe Serbisë, duke u bërë thirrje palëve që mos ta humbasin shansin.

"Marrëveshja mund të arrihet. Kosova do të përfitojë shumë. Kosovës i duhet të zbatojë obligimet e saj dhe të ofrojë Asociacionin e Komunave me Shumicë Serbe menjëherë. Apeli im për Kosovën dhe për Serbinë, është për bisedimet e ardhshme në Ohër: Mos e humbni autobusin”, shkroi në "Twitter" ambasadori gjerman, duke vazhduar argumentimin, se marrëveshja do të përshpejtonte integrimin euroatlantik dhe është "shans historik për rrugën e normalizimit të plotë dhe njohjen reciproke”.

Edhe Raportuesja për Kosovën në Parlamentin Europian, Viola von Cramon, shpreson për një marrëveshje mes Kurtit dhe Vuçiqit në takimin e Ohrit që mbahet me 18 mars nën ndërmjetësimin e shefit të diplomacisë europiane, Josep Borrell. Von Cramon që e shpërndau në "Twitter" shkrimin e ambasadorit gjerman në Prishtinë, tha se "arritja e një marrëveshjeje do të ishte një hap i madh drejt integrimit europian për të dyja vendet.

"Shpresoj shumë që do të shohim të dyja nënshkrimet në marrëveshje në fund të javës në Ohër. Do të ishte një hap i madh drejt integrimit europian për të dyja vendet,” shkroi Viola von Cramon.

Kurti, i gatshëm për nënshkrimin e marrëveshjes

Kryeministri i Kosovës, Albin Kurti, e ritheksoi edhe njëherë që ai është i gatshëm të nënshkruajë marrëveshjen për normalizim të marrëdhënieve me Serbinë më 27 shkurt në takimin e Brukselit. Sipas tij, marrëveshja themelore për normalizimin që u propozua nga BE-ja, apo siç njihet ‘plani franko gjerman' "përmban një avancim drejt njohjes së ndërsjellë mes dy shteteve”.

Kryeministri këto komente i bëri në një videomesazh drejtuar një Forumi të Universitetit të Mannheim-it në Gjermani, ku tha se shpreson që refuzimi i Vuçiqit, që të nënshkruante në Bruksel, nuk është shenjë se ai nuk pajtohet me përmbajtjen e marrëveshjes.

"Ne besojmë se Marrëveshja themelore mes Kosovës dhe Serbisë përmban një avancim drejt njohjes së ndërsjellë mes dy shteteve. Besojmë se normalizimi i plotë i marrëdhënieve kërkon një njohje të ndërsjellë në qendër të marrëveshjes, si dhe respektim për të drejtat e pakicave në të dyja shtetet.

Siguria dhe paqja në rajon e Europë është më se e nevojshme. Ne jemi të gatshëm të bëjmë përparim edhe përkundër sfidave të mëdha”, tha kryeministri Kurti.

Lajçak: Marrëveshja kërkon zbatim dhe afate kohore

I ngarkuari i Bashkimit Europian, Miroslav Lajçak, të hënën dhe të martën qëndron në Beograd, për të diskutuar për bisedimet e 18 marsit në Ohër, me presidentin serb Vuçiç. Ky i fundit tha se "nuk do të ketë njohje as 'de facto' dhe as 'de jure'”, të pavarësisë së Kosovës. Vuçiç tha se ai do të shkojë në Ohër për takim me Kurtin, por "nuk e ka të qartë se për çfarë do të flitet atje”.

Para se të shkojë në Beograd, i dërguari i BE-së, Miroslav Lajçak, ishte në Prishtinë, ku tha se "janë përmbushur pritjet e tij”, në takimet që pati në me dy udhëheqësit e institucioneve të Kosovës, Presidenten Vjosa Osmani dhe kryeministrin Albin Kurti.

"Që të bëhet dokument ligjërisht i detyrueshëm duhet të pajtohemi se si të zbatohet. Duhet të dimë cilët janë hapat, ritmi dhe afatet kohore, në të kundërtën do të jetë vetëm marrëveshje politike dhe joformale”, tha Miroslav Lajçak, gjatë vizitës në Prishtinë.

Ai tha se BE-ja është e përqendruar në atë që ai e quajti "hap i dytë" që ka të bëjë me finalizimin e planit të zbatimit, që kur të përfundohet, do të kalohet në hapin e radhës, që është formalizimi.

Në takimin e 27 shkurtit që patën në Bruksel kryeministri i Kosovës Albin Kurti dhe presidenti i Serbisë, Aleksandar Vuçiç, i thanë "po" propozimit europian për normalizimin e marrëdhënieve. Plani europian parasheh mes të tjerash përmbushjen e marrëveshjeve të deritanishme, përfshirë edhe atë për Asociacionin e Komunave me Shumicë serbe. Zyrtar të lartë të Shteteve të Bashkuara të Amerikës thanë se marrëveshja mbi udhërrëfyesin e zbatimit të planit europian është thelbësore për normalizimin e marrëdhënieve, ndërsa ecja përpara drejt themelimit të Asociacionit të Komunave me Shumicë serbe, është thelbësore për ndërtimin e së ardhmes së Kosovës./DW