"Fëmijët tanë humbën jetën nga sfidat e rrezikshme"/ Pesë familje britanike ngrenë padi ndaj "TikTok"-ut

16 Janar 2026, 08:55, Kosova & Bota CNA

"Fëmijët tanë humbën jetën nga sfidat e

Pesë familje në Britani pretendojnë se fëmijët e tyre kanë humbur jetën ndërsa përpiqeshin të kryenin "sfidën e errësirës", një sfidë e rrezikshme që ekziston prej dekadash. Prindërit kanë ngritur një padi në Shtetet e Bashkuara, duke fajësuar platformën e "TikTok"-ut për humbjet e fëmijëve.

Familjet besojnë se fëmijët e tyre u përpoqën të imitonin "sfidën" specifike, e cila bazohet në ndalimin e përkohshëm të frymëmarrjes, që sjell rrezikun e dëmtimit serioz të trurit ose vdekjes.

Vajza 13-vjeçare e Liam Walsh, Maya, u gjet pa ndjenja tri vjet më parë. Disa muaj më parë, më 9 dhjetor 2021, 12-vjeçari Noah Gordon kishte humbur jetën, pasi ishte gjetur nga vëllai i tij në dhomën e tij të gjumit. Pavarësisht përpjekjeve për ringjallje nga nëna e tij, Louise Gordon, dhe motra e tij, fëmija nuk mbijetoi.

Më pas pasuan tri incidente të tjera të ngjashme. 14-vjeçari Jules u gjet pa ndjenja nga nëna e tij, Ellen Room. Archie mbeti në aparatura për katër muaj para se të vdiste.

Fëmija i pestë, Isaac 13-vjeçar, u gjet pa ndjenja nga nëna e tij, Lisa Kennevan, e cila gjithashtu u përpoq ta rikthente në jetë. Kur policia sekuestroi pajisjet e tij elektronike, ata gjetën video që dukeshin se ishin regjistruar në "TikTok", por që nuk ishin postuar, në të cilat Isaac tregon qafën dhe qesh.

Prindërit besojnë se fëmijët e tyre u ekspozuan ndaj "sfidës" në fjalë përmes "TikTok"-ut, megjithëse thonë se nuk kanë prova. Kompania ka thënë se të dhënat në lidhje me përmbajtjen që shikonin fëmijët mund të jenë fshirë, si pjesë e rregullave të privatësisë.

"TikTok" ka pohuar vazhdimisht se sfida nuk ka qenë kurrë një trend në platformën e saj dhe se është ndaluar që nga viti 2020. Në të njëjtën kohë, thekson se heq 99% të përmbajtjes që shkel rregullat e saj para se të raportohet.

Seanca e parë dëgjimore e çështjes është planifikuar për të premten. Atje, "TikTok" pritet të kërkojë rrëzimin e padisë, duke argumentuar se çështja është ngritur në juridiksionin e gabuar, pasi incidentet ndodhën në Mbretërinë e Bashkuar.

Në një deklaratë për mediat britanike, "TikTok" shprehu ngushëllimet e saj për familjet, duke përsëritur se ndalon rreptësisht çdo përmbajtje që promovon ose inkurajon sjellje të rrezikshme dhe se ka sisteme zbulimi dhe ekipe speciale për ta hequr atë menjëherë.

Procesi ligjor pritet të përcaktojë nëse dhe në çfarë mase platforma është përgjegjëse për ekspozimin e të miturve ndaj sfidave të rrezikshme në internet. /CNA