E fundit!

12:41 Aktualitet

Skandali me ekspozitat ndërkombëtare të Ramës/ PD kërkon transparencë për financimin e tyre

Zëdhënësja për Antikorrupsionin në PD, Genta Vangjeli ka k...

Europa mbrohet, "mur" kundër dronëve

27 Shtator 2025, 08:47, Kosova & Bota CNA

Incidentet e fundit me dronë në Danimarkë, Rumani dhe Poloni nxorën në pah se ku çalon mbrojtja europiane. BE-ja do të veprojë me një sistem mbrojtës.

Një "mur" dronësh, i cili do të përdorë teknologji të përparuar për të zbuluar, ndjekur dhe kapur mjete ajrore pa pilot. Ky është thelbi i projektit që planifikon BE-ja, të ndërtojë një sistem mbrojtës nga dronët në krahun e saj lindor. Ministrat e Mbrojtjes të BE-së ranë dakord për këtë në një video-konferencë të premten (26.09), siç njoftoi Komisioneri i Industrisë së Mbrojtjes i BE-së, Andrius Kubilius.

"Muri i dronëve" është pjesë e një projekti më të gjerë për mbikëqyrjen e krahut lindor të BE-së, i cili përfshin gjithashtu sisteme mbrojtëse tokësore, siguri detare për Detin Baltik dhe Detin e Zi, si dhe inspektim të situatës me informacione satelitore.

Instrumentet e BE-së pritet të përdoren për financimin e mburojës. "Mburoja mbrojtëse për krahun lindor, me murin e dronëve si thelbin e saj, do t'i sjellë dobi të gjithë Europës", theksoi Kubilius. Gjermania synon të përmirësojë mbrojtjet nga dronët.

Pas alarmeve për dronë në Danimarkë dhe Norvegji, niveli i kërcënimit në rritje nga dronët po diskutohet edhe në Gjermani. Ministri i Brendshëm gjerman, Alexander Dobrindt, tani dëshiron të vendosë rregullore të qarta, madje t'i lejojë Bundeswehr-it edhe të rrëzojë dronë në raste të caktuara.

Dobrindt dëshiron të rregullojë më mirë kompetencat ligjore për t'u mbrojtur nga dronët, raportojnë mediat gjermane. Një katalog përkatës masash do të përcaktojë, ndër të tjera, se kur Bundeswehr-i do t'i lejohet të rrëzojë mjete ajrore pa pilot në kushte të caktuara. Ndërhyrja e armatosur duhet të jetë e mundur, nëse një dron përbën një kërcënim akut për njerëzit apo infrastrukturën kritike dhe kur masat e tjera mbrojtëse janë të pamjaftueshme. Në situata të tilla krize, kompetenca e vendimmarrjes duhet t'i takojë Ministrisë Federale të Mbrojtjes, raportohet në media.

Ukraina, e gatshme të ndihmojë

Ministri ukrainas i Mbrojtjes, Denys Shmyhal, deklaroi se vendi i tij ishte "gati të merrte pjesë në projektin e mburojës së dronëve". Në luftën kundër Rusisë, Ukraina ka zhvilluar një gamë të tërë aftësish për të zbuluar dhe rrëzuar duzinat ruse të dronëve me kosto efektive. "Muri i dronëve do të krijojë një ekosistem thelbësisht të ri mbrojtës në Europë", shkroi Shmyhal në internet.

Një koncept për mbrojtje dukshëm më efektive nga dronët në krahun lindor të BE-së ka qenë në zhvillim e sipër prej muajsh. Por nevoja për këtë u bë më emergjente pas shkeljes masive me dronë rusë në hapësirën ajrore polake dy javë e gjysmë më parë. Avionët luftarakë të gjeneratës së fundit duhej të qëllonin me raketa të shtrenjta për të rrëzuar dronët e lirë.

Ndërhyrje me dronë rusë janë raportuar edhe nga Rumania. Kohët e fundit, dronë të paidentifikuar hynë gjithashtu në mënyrë të përsëritur në hapësirën ajrore daneze, duke paralizuar aeroportet për orë të tëra. Autoritetet dyshojnë se pas incidenteve qëndron një "dorë profesioniste"./ DW