E fundit!

09:27 Kronika

E rëndë në Korçë, 66-vjeçari i jep fund jetës

Rreth orës 08:40, në lagjen nr. 10, Korçë, një automjet ti...

Bllokohet ndihma humanitare në kufirin Gazë-Egjipt

16 Tetor 2023, 21:02, Kosova & Bota CNA

Palestinezët në rripin e Gazës u grumbulluan në spitale dhe shkolla të hënën, në kërkim të një vendi për t’u strehuar. Më shumë se një milion vetë janë larguar nga shtëpitë e tyre përpara një sulmi tokësor të pritshëm izraelit, që synon të shkatërrojë grupin militant të Hamasit.

Ndërsa furnizimet me ushqime, ujë dhe ilaçe po pakësohem, e gjithë vëmendja është përqendruar në vendkalimin Rafah, mes Gazës dhe Egjiptit, ku kamionë me ndihma të nevojshme janë bllokuar prej ditësh. Rafah, pika e vetme lidhëse mes Gazës me Egjiptin, u mbyll gati një javë më parë për shkak të sulmeve ajrore izraelite.

Ministri i Jashtëm i Egjiptit Sameh Shoukry tha se Izraeli "nuk ka ende një qëndrim për të hapur kalimin nga ana e Gazës". Qeveria izraelite nuk i është përgjigjur një kërkese për koment.

Qindra mijëra palestinezë të strehuar në objektet e OKB-së marrin më pak se 1 litër ujë në ditë. Spitalet kanë paralajmëruar se janë në prag të kolapsit, ndërsa po u mbaron karburanti dhe medikamentet mjekësore.

Ministria e Shëndetësisë në Gazë tha se 2,750 palestinezë janë vrarë dhe 9,700 janë plagosur që nga shpërthimi i luftimeve, më shumë se gjatë luftimeve në Gazë në vitin 2014, që zgjatën mbi gjashtë javë. Kjo e bën këtë konfliktin më të përgjakshëm nga pesë luftërat e Gazës, për të dyja palët.

Më shumë se 1,400 izraelitë kanë humbur jetën, pjesa dërrmuese e të cilëve civilë të vrarë gjatë sulmit të Hamasit më 7 tetor. Ushtria izraelite tha të hënën se rreth 200 persona janë marrë peng në Gazë, shifër më e lartë se vlerësimet e mëparshme. Ushtria nuk specifikoi nëse ky numër përfshin edhe shtetasit e huaj.

Sulmet ajrore izraelite kanë shkatërruar lagje të tëra në Gazë, ndërsa militantët palestinezë vazhdojnë të gjuajnë raketa drejt Izraelit.

Izraeli pritet të nisë një ofensivë tokësore që synon eliminimin e udhëheqësve të Hamasit, të shpëtojë pengjet dhe shkatërrojë infrastrukturën ushtarake të grupit militant, pjesa më e madhe e së cilës është në zonën e Gazës./ VOA