Brozoviç nuk rikuperohet as për ndeshjen e radhës, Asllani drejt fanellës së titullarit kundër…

2023-01-26 21:59:06, Sport CNA

Për të lënë pas humbjen me Empolin, Interi duhet të kthehet sa më parë te fitorja dhe Simone Inzagi ka nisur përgatitjet për sfidën e së shtunës, atëherë kur pavarësisht kundërshtarit të lehtë në letër, duhet të bëjë një paraqitje bindëse nëse do që të mbajë në rrugën e duhur të tijtë. Gjithsesi, gjërat nuk do të jenë të thjeshta për trajnerin që në këtë ndeshje duhet t’i bëjë llogaritë pa disa prej liderëve të skuadrës.

Milan Shkriniar i ndëshkuar me karton të kuq dhe Nikolo Barela me atë karton të verdhë ndaj Empolit, do të jenë kështu të skualifikuar për fundjavën, ndërkohë që lajmi tjetër i keq ka ardhur nga infermieria. Marselo Brozoviç vazhdon të stërvitet i diferencuar dhe stafi mjekësor ka lajmëruar se nuk do të jetë gati për rikthimin ndaj Kremonezes dhe me shumë mundësi edhe për Atalantën në Kupë.

Synimi i të gjithëve është që kroati të jetë i gatshëm për 5 shkurtin, ditën e derbit me Milanin, përballje në të cilën do të kthehen edhe Shkriniar e Barela. Gjithsesi, ai që ndaj Kremonezes mund të marrë më shumë përgjegjësi është Lukaku që pas disa minutave ndaj Empolit duket i gatshëm për t’u nisur titullar.

ASLLANI – Me mungesat e sigurta të Barelës e Brozoviçit, të vetmit lojtarë të sigurt për Inzagin në mesfushë janë Çalhanoglu e Mikhitarian, ndërkohë që siç raporton “Corriere dello Sport”, gjithmonë e më shumë po merr formë mesfusha me Asllanin si titullar.

Elbasanasi pritet të marrë vendin e italianit, edhe pse nuk është ky roli i tij natyral, pavarësisht se ndaj Veronës, për të njëjtat mungesa trajneri zgjodhi Galjardinin. Këtë herë Inzagi mund të zgjedhë të rrezikojë dhe të dalë jashtë zgjedhjes të tij të përhershme, atë të aktivizimit të secilit në pozicionin e tij natyral.