web counter
LEXO PA REKLAMA!

SHKARKO APP

App Store
Google Play

E fundit!

x

Nxehet Blushi i Metës/ Bën avokatin e Agron Shehajt

2022-10-20 19:12:00, Politikë CNA
Nxehet Blushi i Metës/ Bën avokatin e Agron Shehajt
Tedi Blushi i Partisë së Lirisë së Ilir Metës

Tedi Blushi i Partisë së Lirisë së Ilir Metës ka reaguar ashpër për mbylljen e biznesit të deputetit demokrat, Agron Shehaj.

Me anë të një statusi në rrjetet sociale, Blushi e cilëson mbylljen e biznesit të Shehajt si një sulm politik, me qëllim për ta intimiduar dhe shantazhuar.

Ai bën thirrje për kryeministrin Edi Rama të mos sulmojë Shehajn dhe i kërkon bizneseve të reagojnë ndaj çdo arbitrariteti dhe gjobëvënie.

“Në panik nga urrejtja e madhe popullore, shkëputja e kontrollit mbi opozitën dhe humbja e zgjedhjeve të ardhshme lokale, Edi Rama ka nisur sulmet politike kundër të bizneseve të ndershme, të identifikuara nga patronazhistët si mbështetëse të opozitës shqiptare.

Ndërkohë që oligarkët dhe sipërmarrjet e klientëve të tij me lidhje të shumëfishta me pushtetin nuk paguajnë sot taksa, nuk njohin gjoba dhe gllabërojnë taksat e shqiptarëve në shkelje të çdo ligji, bizneset e rregullta po terrorizohen dhe ndëshkohen me sekuestro mafioze nga falangat e Policisë së Shtetit dhe taksidarët e Ministrisë së Financave.

Me qëllim për të intimiduar dhe shantazhuar një zë kurajoz të opozitës shqiptare, deputetin Agron Shehaj, kapuçzinjtë e Edi Ramës i janë vërsulur sot forcërisht kompanisë së tij pa asnjë urdhër nga Prokuroria, pa asnjë urdhër nga gjykata, pa asnjë urdhër dhe shkresë nga askush.

Duke dënuar me forcë këtë sjellje arbitrare të Policisë së Shtetit, si dhe duke e inkurajuar drejtësinë të reagojë menjëherë për të ndëshkuar përgjegjësit, i bëjmë thirrje Edi Ramës të heqë dorë nga sulmet ndaj bizneseve të ndershme dhe të ligjshme, të cilat nuk i shikon si mundësi për zhvillimin e vendit, por i shikon si rrezik për bandën e tij.

Gjithashtu u bëjmë thirrje të gjitha bizneseve të reagojnë ndaj çdo arbitrariteti dhe gjobëvënie nga taksidarët e Qeverisë, të cilët i paralajmërojmë të bëjnë kujdes në raport me ligjin pasi nuk do t'i shpëtojnë kurrë llogaridhënies.

Edi Rama ta ketë të qartë njëherë e përgjithmonë se koha kur opozita e kapur prej tij blihej, shitej apo shantazhohej ka marrë fund!

Më të vendosur se kurrë në betejën për mbrojtjen e interesit qytetar, të bizneseve të ndershme dhe shporrjen e këtij regjimi mafioz!

Asgjë nuk na ndal më!”, shkruan Blushi./ B.A. – CNA.al





Lajmet e fundit nga