Ermal Mulosmani rendit dështimet e Bashës/ Rikthimi tragjik i Lulit qesharak në mexhlisin politik

2023-02-03 21:35:00, Politikë CNA

Ermal Mulosmani rendit dështimet e Bashës/ Rikthimi tragjik i Lulit

Gazetari Ermal Mulosmani

Gazetari Ermal Mulosmani ka renditur dështimet e ish-kryetarit të PD-së, Lulzim Basha.

Me anë të një statusi në rrjetet sociale, Mulosmani thotë se rikthimi i Bashës edhe një herë në mexhlisin politik, tashmë si viktimë e intrigave të "Trekëndëshit të Bermudës", është po aq tragjik sa edhe kthimi i Berishës.

Ai thotë se ish-kreu i PD-së është shembulli më ekselent sesi nuk duhet të jetë një lider, ndërsa përmend dështimin me ngritjen e çadrës, koalicionin me Edi Ramën, diegien e mandateve dhe dorëheqjen.

Shkrimi i plotë:

Rikthimi i Lul Bashës edhe një herë në mexhlisin politik, tashmë si viktimë e intrigave të "Trekëndëshit të Bermudës", është po aq tragjik sa edhe kthimi i Berishës.

Berisha provoi se ai ishte PD-ja. Pa vulë, pa seli, pa financime, i shpallur non-grata, me njëmijë mëkate mbi kurriz, afër 80 vjeç mori dyfishin e votave të PD-së me seli, vulë, logo, kryetar riosh, me mbështetjen e amerikanëve, evropianëve dhe me staf të afërt pa mëkate nga e shkuara. Ishte si një kalorës i mesjetës të mundë një marins amerikan.

Ky është fakt i ditur botërisht. Por kjo nuk është arsyeja e vetme e largimit përfundimtar nga politika të Bashës.

Lulzim Basha ishte i pazoti të ndërtonte imazhin e një lideri që frymëzon. Përkundrazi, me koshiencë përdori hijen e Berishës për të krijuar një përgjegjësi të dyfishtë për vendimet e forta. Ai do të hyjë në histori si Kryetari i Bashkisë së Tiranës që dëshmoi paaftësi proverbiale duke mos lënë pas vetes asnjë vepër publike! Përveç atij turpit që e bëri sheshin kryesor të Tr në formë linesi.

Në 2017-ën hoqi gjithë gardën berishiste dhe la Komandantin në listë! Ky është një veprim tipik i një njeriu pa forcë vendimmarrëse. Ai duhej të largonte Berishën dhe, nëse nuk do ta bindte për të mos qenë në listën e deputetëve, atëherë, do ia kisha dorëzuar çelësat e partisë. Kështu bëjnë njerëzit që duan të ndërtojnë një imazh të ri. Nuk ndërtohet imazhi duke larguar ushtarët por mareshalin. Në rast se do hiqte mareshalin ushtarët do të viheshin në rresht.

Lulzim Basha është shembulli më ekselent sesi nuk duhet të jetë një lider. Ai u bë qesharak duke shpallur kauza të dështuara. Kur ngriti çadrën, i ziu, pas dy muajsh nuk ishte në gjendje të thoshte se çfarë do ndodhte. Rrinte si hut duke soditur një lojë shahu të Aldo Bumçit me duar në kokë!!! Edi Rama për pak po shkonte në zgjedhje pa opozitë, tallej çdo ditë me opoziatrët duke i ofruar poste qesharake. Basha u zbyth dhe shkoi në zgjedhje si dështak. Pa koalicion parazgjedhor siç e parashikonte Kodi Zgjedhor . Kjo ishte si t’ia falje fitoren Edi Ramës në tavolinë. Mbështetësit u zhgënjyen. Tallja e liderit është edhe tallje e tyre.

Pas dështimit spektakolar të çadrës, doli djegia e mandateve të deputetëve dhe dorëzimi i pushtetit lokal në duart e Ramës!!! Do mjaftonte kjo gafë politike për ta zhdukur politikisht emrin e Lul Bashës nga Partia Demokratike. Çfarë llogarie dha?! Supozojmë se vendimi është i Berishës. Ore zotëri, nëse i merr vendimet Berisha ik! Ik me vrap dhe thuaj që Ai burri nuk e ka lënë pushtetin! Nxirre përballë të vërtetës! Kështu të paktën mund të rikthehesh dikur sepse tregove dinjitet! Por jo. Në politikë është si në futboll. Kur ekipi shkon në rënie të lirë ndërrohet trajneri i pari, edhe kur e kanë fajin lojtarët! Por jo te ne. Përkundrazi!

Dhe mbi të gjitha, dorëheqja me vulë në xhep. Mënyra sesi ka dhënë dorëheqje, pa e depozituar askund dorëheqjen, duke marrë vulën, logon dhe duke administruar financimet shtetërore të PD-së është tipike e një njeriu hilanjos. Që nuk ka turp, por kapet pas proçedurave dhe qesh me paaftësinë e një partie të tërë që nuk dijnë si t’ia të bëjnë!

Ky lloj eunuku politik, po serviret si lideri evropian, e ardhmja demokratike e shqiptarëve, dërrmuesi i Trekëndëshit të Bermudës, shpresa jonë për progres...

Aman na gjeni një të paprovuar se këtë e dimë se ç'është.../ B.A. - CNA.al