Vetting-u/Manovrat e Alfred Ballës për të shpëtuar kokën
2024-01-29 15:08:00, AktualitetCNA
Alfred Balla
Alfred Balla, “misionari” i radhës i pushtetit kundër SPAK-ut, ministri hije i Rilindjes në krye të KLP-së, më herët ka tentuar që t'i shmanget edhe procesit të Vetting-ut, si ai i deklarimit të pasurisë, pastërtisë së figurës dhe aftësitë profesionale. Më në fund ia doli, duke u ndihmuar nga Komisioni i Pavarur i Kualifikimit.
Në një ankim të Komisionerëve Publikë, që mban datën 30 qershor 2023, renditen shkeljet që ka bërë kreu i KLP-së për këtë proces, duke përdorur një sërë skemash, se si të arrinte qëllimin që të mos i nënshtrohej këtij procesi.
Kreu i Këshillit të Lartë të Prokurorisë ishte sipas legjislacionit në fuqi subjekt i vetting-ut për shkak të punës së tij si ndihmës ligjor në Gjykatën e Lartë deri në 31 korrik 2017 dhe duhej t'i nënshtrohej procesit të rivlerësimit.
Por çfarë bëri Alfred Balla?
Fillimisht ai kundërshtoi me “email”-e këtë proces. Në ankimimin e bërë nga Komisioneri Publik theksohet se subjekti i rivlerësimit, (Alfred Balla) pretendon "se një proces i tillë Vetting-u nuk është i nevojshëm për të, pasi nuk ka statusin e magjistratit si ndihmës ligjor në Gjykatën e Lartë". Balla bëri një padi në Gjykatën Administrative.
Një kërkesë tjetër ai bëri edhe në KLGJ, për njohjen e statusit të Këshilltarit/Ndihmësit jomagjistrat pranë Gjykatës së Lartë.
Por, më 6 qershor të vitit 2022, OMN u shpreh e vendosur që Balla t'i nënshtrohej procesit të rivlerësimit.
"Alfred Balla është subjekt rivlerësimi dhe, si i tillë, duhet t’i nënshtrohet procesit të rivlerësimit. Për më tepër, statusi që z. Balla kishte në momentin e hyrjes në fuqi të ndryshimeve kushtetuese, nuk është hequr apo zhdukur gjatë kohës dhe nuk është ndikuar nga fakti që z. Balla nuk ushtronte më detyrën e Ndihmësit ligjor jomagjistrat dhe u bë anëtar i Këshillit të Lartë të Prokurorisë", thuhej në vendimin e OMN-së.
Balla vijoi manovrat
Kur kreu i KLP-së ndodhej nën procedurat e vetting-ut çështja ishte në Gjykatën Administrative të Apelit.
Kjo e dyta vendosi në mars 2023 të prishë vendimin e Shkallës së Parë dhe të rrëzojë padinë. Në shkurt të vitit 2023, ai hoqi dorë nga padia dhe paraqiti në Këshillin e Lartë Gjyqësor edhe kërkesë për heqje dorë nga njohja/pasja e statusit të Këshilltarit/Ndihmësit ligjor pranë Gjykatës së Lartë.
Ndërkohë, trupi i rivlerësimit vijonte me procesin e vetting-ut. Më 30 maj të vitit të kaluar, Balla u shpreh i vendosur për të mos u paraqitur në komision. Ai njoftoi Komisionin në rrugë elektronike "se nuk dëshiron të njihet me prova të tjera dhe as të marrë pjesë në seancë dëgjimore".
Si e "shpëtoi" KPK-ja?
"Trupa gjykuese e Komisionit, përfundimisht, ka vlerësuar se në rastin konkret jemi para zbatimit të nenit 103 të K. Pr. Administrative dhe ka vendosur: [...] Të deklarojë përfundimin e procesit të rivlerësimit pa një vendim përfundimtar për z. Alfred Balla”.
Ishte ky vendimi i KPK-së që procesi i vetting-ut ndaj Ballës të mos vijonte. Pra, shumica e trupës gjykuese të KPK-së, përbërë nga Alma Faskaj dhe Xhensila Pine vlerësuan se kreu i KLP-së nuk ishte më subjekt rivlerësimi dhe se procesi ndaj tij mbyllej pa vendim.
Pine dhe Faskaj arsyetuan se Balla nuk kishte dhënë dorëheqjen dhe se statusin e kishte humbur për shkak se ishte shkarkuar nga kreu i Gjykatës së Lartë në korrik 2017.
Në këtë mënyrë, edhe pas thirrjeve të Teo Jakobs, Balla vijonte të mos i përgjigjej këtij procesi, duke u përpjekur për ta anashkaluar.
Konkluzionet e Komisionerit Publik dhe kërkesa ndaj KPA-së Komisioneri Publik u shpreh se Alfred Balla ka pasur si qëllim për t’iu shmangur kryerjes së procesit të rivlerësimit dhe të gjitha manovrat e tij i ka bërë vetëm për këtë qëllim.
"Komisioneri Publik vlerëson se të gjitha veprimet e kryera prej tij lidhur me procesin e rivlerësimit, përfshirë edhe vetë heqjen dorë nga e drejta e padisë së paraqitur për gjykim nga subjekti i rivlerësimit, z. Alfred Balla, përpara juridiksionit gjyqësor administrativ, si dhe heqjen dorë nga kërkesa për njohjen/pasjen e statusit të Këshilltarit/Ndihmësit ligjor pranë Gjykatës së Lartë paraqitur në KLGJ, depozitimi i vendimit të Gjykatës së Apelit Administrativ për prishjen e vendimit të Gjykatës së Shkallës së Parë dhe rrëzimin e padisë, si dhe ai i KLGJsë për heqjen dorë nga kërkesa, si aktet ku subjekti i rivlerësimit bazonte kërkesën e tij për ndërprerjen e procesit të rivlerësimit nga ana e Komisionit, janë shprehje e qartë dhe e lirë e vullnetit të tij për t’iu shmangur kryerjes së procesit të rivlerësimit", thuhet në konkluzionet e Komisionerit Publik.
Duket iu referuar këtyre përfundimeve, Komisioneri Publik i kërkoi Kolegjit të Posaçëm të Apelimit në qershor të vitit të kaluar që ndryshohen dy vendime të KPK-së për Alfred Ballën.
E para është që të mos ndërpritet procesi i rivlerësimit për Ballën. Komisioneri Publik, Florian Ballhysa, i kërkon KPA-së ndryshimin e vendimit të KPK-së për Alfred Ballën dhe që ndërprerja e procesit të vetting-ut ndaj tij të shoqërohet me sanksionin që i ndalon emërimin në sistemin e drejtësisë për 15 vjet.
"Ndryshimin e vendimit nr. 675, datë 16.6.2023, të Komisionit të Pavarur të Kualifikimit, në këtë mënyrë: 1. Ndërprerjen e procesit të rivlerësimit ndaj subjektit, z. Alfred Balla. 2. Ndalimin e subjektit të rivlerësimit, z. Alfred Balla, të emërohet gjyqtar ose prokuror i çdo niveli, anëtar i Këshillit të Lartë Gjyqësor ose i Këshillit të Lartë të Prokurorisë, Inspektoratit të Lartë të Drejtësisë ose Prokuror i Përgjithshme për një periudhë 15-vjeçare", thuhet në ankimim./CNA
