Situata në aksin Librazhd-Pogradec/ Rrezik nga spostimi dhe thërrmimi i strukturës

2026-02-21 17:05:00, Aktualitet CNA

Situata në aksin Librazhd-Pogradec/ Rrezik nga spostimi dhe thërrmimi

Situata në aksin nacional Librazhd-Pogradec është përkeqësuar ndjeshëm gjatë 48 orëve të fundit, duke detyruar Autoritetin Rrugor Shqiptar të bllokojë plotësisht qarkullimin.

Problematika është konstatuar në urën në zonën e njohur si “Arrat e Gurrës”, ku sipas të dhënave zyrtare është regjistruar spostim i strukturës dhe thërrmim i betonit në bazament.

Shkak dyshohet të jetë gërryerja nga lumi në zonën ujëmbajtëse të quajtur Ligata e Bicës. Edhe pse trupi i urës nuk paraqet çedime, dëmtimi në bazë e bën atë të pasigurt për qarkullim, çka solli vendimin për bllokim total të aksit.

Rruga Lozhan-Moglicë është një rrugë malore me gjerësi të kufizuar. Pavarësisht se është rikonstruktuar më herët, në disa pjesë të saj evidentohen dëmtime të konsiderueshme, të shkaktuara kryesisht nga reshjet e fundit.

Situata në aksin Librazhd-Pogradec/ Rrezik nga spostimi dhe thërrmimi

Segmenti konsiderohet i paaksesueshëm për mjetet e tonazhit të rëndë, pasi kalimi i kamionëve rrit ndjeshëm rrezikun për shembje të tjera të trupit të rrugës dhe përkeqësim të mëtejshëm të situatës. Një skenar i tillë mund të çojë në bllokim të plotë të aksit.

Më shqetësues mbetet fakti se rreziku për aksidente në këtë segment është i lartë, duke e bërë të domosdoshme ndërhyrjen e shpejtë të autoriteteve për garantimin e sigurisë së përdoruesve të rrugës.

Situata në aksin Librazhd-Pogradec/ Rrezik nga spostimi dhe thërrmimi

Bllokimi i këtij segmenti ka sjellë devijimin e qarkullimit në rrugë alternative, duke rritur ndjeshëm fluksin e mjeteve, veçanërisht të atyre që udhëtojnë nga Korça drejt Tiranës.

Shtimi i trafikut ka krijuar ngarkesë të konsiderueshme në segmentet dytësore, duke vështirësuar më tej lëvizjen dhe duke shtuar rrezikun për incidente rrugore.

Në këto kushte, situata kërkon monitorim të vazhdueshëm dhe një plan të qartë ndërhyrjeje emergjente për rehabilitimin e segmenteve problematike. Deri në një njoftim të dytë, drejtuesit e mjeteve këshillohen të tregojnë kujdes maksimal, pasi fluksi i shtuar i mjeteve në akset alternative rrit ndjeshëm presionin mbi infrastrukturën ekzistuese dhe rrezikun për ngjarje në qarkullim./CNA