Sulmi ndaj Berishës një akt terrorist/ Pistat ku mund të hetohet

2022-12-07 11:31:00, Aktualitet CNA

Një akt terrorist e konsideroi eksperti i sigurisë Fatjon Softa ngjarjen e ndodhur dje në protestën e opozitës, ku u godit me grusht kryedemokrati Sali Berisha.

Duke folur në MCN Live Softa thotë se ngjarja e rëndë nuk ka qenë një sjellje individuale, duke shtuar se duhet hetuar në disa pista, ku përfshihen grupet radikale dhe politika.

Softa thotë se dje mund të kishim edhe ekzekutim personi, duke shtuar se Policia e Shtetit duhet të ngrejë në një nivel tjetër sigurinë.

Kjo, sipas tij është një nga ngjarjet më të rënda që ndodh me një lider të PD, pas vrasjes së Azem Hajdarit.

“Goditet një ish-president, një ish-kryeministër. Duhet të hetohet dhe s’duhet të merret si diçka e rastit dhe rastësore. Kemi disa elementë, nga pikëpamja fizike ai duket i përgatitur, mënyra si shkon, tregon se ka përgatitje të mirë fizike. U deshën disa roje që mezi e mposhtën, e neutralizuan. Ai vjen nga një ambient fetar. Nëse janë grupe radikale apo shtyrje nga grupe radikale…

Pyetja që unë ngre, pse pikërisht në këtë ditë?! Kur ishte ngjarja më e rëndësishme jo vetëm për Shqipërinë, por gjithë hapësirën ballkanike dhe shkon dhe godet liderin”, është shprehur ai.

Softa ka thënë më tej se janë disa pista ku mund të hetohet.

Sipas tij mund të jenë grupe radikale, mund të jetë politika.

“E përjashtoj një sjellje individuale, sepse veprimet e tij ishin të qarta, të zhdërvjellta, agresive.

Veprimet e tij janë s’janë të shkujdesura. Çedoi patjetër mbrojtja e afërt e sigurisë. Duhet të kishim një double mbrojtje. Meta ka një ruajtje për 4 vjet, ka makinë, ka roje.

Shqipëria është në kuadër të sulmeve të mundshme terroriste...Duhet të kishte depërtim të strukturave të policisë brenda protestës. Fatmirësisht ndodhi kjo, mund të kishim edhe ekzekutim personi. Kemi rastin e Japonisë.

Nëse do kishte armë të ftohtë çfarë do ndodhte? Duhet të ngremë nivelin e sigurisë në nivel tjetër, jo vetëm për Berishën edhe për personalitetet e tjera. U rrezikua siguria kombëtare në këtë vend. Pse goditi Berishën dhe jo një person tjetër?! Kur goditet ish-kryeministri mendo për qytetarët e thjeshtë. Mendo çfarë elemente sigurie kemi në këtë vend.

Kishim një helikopter në ajër, 1500 forca sigurie, ndodhi në zemër të kryeqytetit. Nuk kishte ndonjë densitet të jashtëzakonshëm. Të shikohen kamerat, nga ka ardhur, personat që ka takuar dhe si depërtoi. Policia e Shtetit duhet të rishohë masat e sigurisë. Më vjen keq që kjo festë kthehet në një situatë që krijon këtë lloj pasigurie. Unë e quaj akt terrorist.

Kërkoj hetime të thella dhe të dalë përgjegjësia. Nuk mund të mbulohemi dot duke thënë se ai është me të meta mendore. Nëse do ndodhte që edhe nga grushti do kishte humbje jete, si do ishte?! Goditja ishte në kokë, ishte e fortë.

Duhen parë të gjithë elementët deri te aksioni. Kush është pas tij. Doktori thotë se kjo lloj sëmundje ka disa zëra. Po kush e mësoi, shkon në mënyrë perfekte dhe godet personin e duhur!”, është shprehur Softa.