Auto Moto Park Albania/ Blendi Gonxhja: Ambicie historike, ja kur do të shpallet fituesi i projektit

2023-01-24 08:32:00, Aktualitet CNA

Auto Moto Park Albania/ Blendi Gonxhja: Ambicie historike, ja kur do të

Foto ilustruese

Drejtori i Përgjithshëm i Shërbimit të Transportit Rrugor Blendi Gonxhja ka zbuluar se në datën 3 shkurt do të shpallet fituesi i projektit të Auto Moto Park Albania në Krastë, të Elbasanit.

Kjo pistë do të ketë një shtrirje prej qindra mijë m2.

Paralel me investimet infrastrukturore në funksion të Auto Moto Park (AMP), Gonxhja shkruan se 5 studio arkitekture, më të njohurat në botë po punojnë për garën ndërkombëtare të organizuar nga DPSHTRR, për shpalljen në 3 Shkurt 2023 të projektit fitues, që mundëson për herë të parë një pistë të certifikuar nga FIA për nivelin maksimal, F1 e Moto GP, jo vetëm për Shqipërinë por edhe për një Balkan Grand Prix.

“Ndryshe nga çdo kantier a projekt tjetër deri tani, punimet që paraprijnë realizimin e Auto Moto Park Albania, në Krastë, Elbasan, në një shtrirje me qindra mijë m2, janë diçka që të mbimbreson për nga madhështia e ndërmarrjes dhe rëndësia e ndikimit që kjo vepër unike, me përmasa rajonale, ka për Qarkun e Elbasanit dhe vendin! Paralel me investimet infrastrukturore në funksion të Auto Moto Park (AMP), 5 studio arkitekture, disa nga më të njohurat në botë për strukturat e motorsportit, të parakualifikuara zyrtarisht, po punojnë për garën ndërkombëtare të organizuar nga DPSHTRR, për shpalljen në 3 Shkurt 2023 të projektit fitues, që mundëson për herë të parë një pistë të certifikuar nga FIA për nivelin maksimal, F1 e Moto GP, jo vetëm për Shqipërinë por edhe për një Balkan Grand Prix!

Ambicie historike, tashmë në jetëzim e sipër, që hap një perspektivë të shkëlqyer për automotorsportin shqiptar, sektorin automotiv, turizmin, punësimin, sigurinë rrugore, kthimin e zonës në epiqendër rajonale aktivitetesh sportive, formuese, edukative e kulturore, shërbimet e transportit rrugor, ekonominë e zhvillimin!”, ka shkruar Gonxhja./ CNA.al