Rriten yield-et e obligacioneve 20-vjeçare, arrijnë në 6.5%

11 Qershor 2025, 14:09, Ekonomi CNA

Yield-et e obligacioneve 20-vjeçare u rritën në ankandin e kësaj jave. Sipas të dhënave nga Banka e Shqipërisë, yield-i uniform i pranuar i këtyre instrumenteve u rrit në 6.5%, nga 6.17% që kishte qenë në ankandin e fundit të këtyre instrumenteve, në muajin mars.

Nga 2 miliardë lekë që kishte qenë shuma e shpallur për financim nga Ministria e Financave, vlera totale e kërkesave në ankand u kufizua në 1.93 miliardë lekë. Kërkesa më e ulët se shuma e ofruar mund të shpjegojë pjesërisht rritjen e yield-it të këtyre instrumenteve.

Nga ana tjetër, prej më shumë se një viti yield-et e titujve të borxhit të qeverisë shqiptare po ndjekin një tendencë rënëse, rënie që ka arritur nivele të paprecedenta, e shprehur si marzh në raport me normën bazë të interesit.

Edhe për këtë arsye është e pritshme që tregu të ndjekë një fazë korrektimi, sidomos në instrumentet me afat më të gjatë maturimi.

Obligacionet 20-vjeçare janë instrumentet më afatgjata të borxhit të emetuara ndonjëherë nga qeveria shqiptare.

Këto instrumente janë një alternativë e mirë sidomos për investitorët institucionalë. Veçanërisht për shoqëritë që administrojnë fonde me horizont afatgjatë, si fondet private të pensionit, obligacionet 20-vjeçare krijojnë mundësi për të pasuruar spektrin e titujve në portofolë dhe për të rritur kthimet për anëtarët.

Shtimi i instrumenteve të borxhit me maturim më afatgjatë krijon më shumë premisa për të zhvilluar tregun dytësor të titujve, për t’i bërë këta tituj më likuidë. Për herë të parë vitin e kaluar, tregu i instrumenteve të borxhit të qeverisë shqiptare në lekë tërhoqi edhe investitorë institucionalë nga jashtë vendit.

Obligacionet 20-vjeçare u emetuan për herë të parë në muajin janar të këtij viti, nëpërmjet një ankandi për testimin e tregut.

Kërkesa nga investitorët rezultoi mjaft e lartë dhe nga 1.5 miliardë lekë që ishte shuma e shpallur e emetimit, në ankand u paraqitën kërkesa totale në vlerën e 4.26 miliardë lekëve. Yield-i uniform i pranuar dhe kuponi i obligacionit rezultuan në nivelin 6.78%, poshtë kuponin referencë prej 7% të paraqitur para ankandit nga Ministria e Financave.

Në rihapjen e ankandit, që u zhvillua në muajin mars, yield-i uniform i pranuar i ankandit zbriti në 6.15%, duke ndjekur tendencën e përgjithshme të tregut të instrumenteve të borxhit qeveritar.

Edhe rihapja e ankandit tërhoqi interes mjaft të lartë të investitorëve. Nga 1 miliard lekë që ishte shuma e shpallur e emetimit, në ankand u paraqitën kërkesa totale në vlerën e 2.67 miliardë lekëve.

Ndërkohë, në ankandin e kësaj jave kërkesa nga investitorët pësoi rënie, duke reflektuar pjesërisht edhe disa kufizime që vazhdojnë të aplikojnë disa prej bankave me kapital të huaj, që kanë limite për sa i takon investimit në instrumentet më afatgjata të borxhit të qeverisë shqiptare./ Monitor.al