Lufta në Ukrainë, si produkt i frymëzimit të Putinit nga ideologjia marksiste-leniniste

11 Qershor 2022, 09:54, Blog Lee Edwards

Lufta në Ukrainë, si produkt i frymëzimit të Putinit nga

Ndonjëherë shpjegimi më i thjeshtë është edhe më i miri. Ju nuk mund ta kuptoni Vladimir Putinin dhe luftën e tij kundër Ukrainës, në rast se nuk e kuptoni se ai është në thelb një marksist-leninist. Gjatë viteve të shkollës, Vladimir Putini lexonte në kohën e lirë veprat e Marksit, Engelsit dhe Leninit.

Ai arriti në moshën madhore në vitin 1973, kur Bashkimi Sovjetik ishte një superfuqi, dhe sponsorizonte regjimet marksiste në çdo kontinent, duke çuar përpara ëndrrën e Leninit për një botë komuniste. Ai iu bashkua KGB-së në vitin 1977 në moshën 25-vjeçare, dhe i kaloi 14 vitet që pasuan duke u ngritur deri në gradën e nënkolonelit.

Lufta në Ukrainë, si produkt i frymëzimit të Putinit nga

Në vitin 1984, ai u dërgua në Moskë për trajnime shtesë në Institutin e Flamurit të Kuq “Juri Andropov”. Si drejtues i KGB-së, Andropov kishte ushtruar presion që Traktati i Varshavës të shtypte Pranverën e Pragës në vitin 1968. Për një marksist-leninist, lufta brenda kombeve dhe midis kombeve është e pashmangshme.

Marksi thoshte dikur se “lufta është nëna e revolucioneve”. Edhe Lenini ra dakord, me këtë thënie, duke shtuar se “çështjet e mëdha historike mund të zgjidhen vetëm me dhunë”. Mao Ce Duni, të cilin Putin me siguri e ka lexuar, shkroi: “Çdo komunist duhet të kuptojë se fuqia politike rritet nga tyta e armës. . . .Në fakt, mund të themi se e gjithë bota mund të riformulohet vetëm me një armë”.

Kjo është ideologjia që formoi Vladimir Putinin. Një marksist-leninist i arsimuar si Putin, e pranoi se komunizmi ka shkaktuar më shumë se 100 milionë viktima, një çmim ky i pranueshëm për të paguar për rimodelimin e botës.

Ai pranoi spastrimet që ndërmorën Lenini dhe Stalini për të çimentuar sundimin e tyre, zitë e bukës që eliminuan armiqtë e shtetit, kampet e punës së detyruar në Siberi, kontrollin e rreptë të të gjitha mediave. Putin i studioi me kujdes teknikat e agjitacionit dhe propagandës, dhe i zbatoi ato me fanatizëm në detyrën e tij në KGB në Dresden në Gjermaninë Lindore gjatë Luftës së Ftohtë.

Ai dha dorëheqjen nga KGB në vitin 1991 për të filluar karrierën politike në Shën Petersburg, vendlindjen e tij. Ai kishte një prirje për politikën makiaveliste, dhe u transferua në Moskë për t’iu bashkuar administratës së presidentit të atëhershëm Boris Jelcin.

Ai u ngrit shpejt në krye të vendit. Në gushtin e vitit 1999, Putin u emërua si një nga tre zëvendëskryeministrat, dhe më pas u emërua në të njëjtën ditë kryeministër në detyrë. Ai nuk ka hequr dorë nga pushteti deri më sot. Duke pasur parasysh trajnimin e tij në KGB, ishte e pamundur që Putin mos t`i manipulonte zgjedhjet, të rishkruante kushtetutën ruse, të burgoste dhe madje të helmonte kundërshtarët e tij, të mbyllte organizatën Memorial dhe çdo OJQ tjetër që tërhiqte vëmendjen ndaj krimeve të marksizëm-leninizmit, të urdhëronte nënshtrimin brutal të Çeçenisë, të aneksonte Krimenë dhe të pushtonte Ukrainën.

Lufta në Ukrainë, si produkt i frymëzimit të Putinit nga

Duke shkruar mbi Rusinë e shekullit XVII, një nga historianët më të njohur rusë e akuzon atë me këtë frazë tepër thumbuese: “Shteti u fry ndërsa njerëzit u tkurrën!”. I njëjti portret është i vërtetë për Rusinë e sotme dhe presidentin e saj Vladimir Putin.

Në fjalimin e tij të vitit 2005 drejtuar politikanëve dhe parlamentit, Putin tha: “Mbi të gjitha, ne duhet të pranojmë se rënia e Bashkimit Sovjetik ishte fatkeqësia më e madhe gjeopolitike e shekullit XX”. Si kryeministër dhe president, Putin është përpjekur vazhdimisht të ndërtojë një perandori të re ruse, së fundmi me pushtimin e tij në Ukrainë.

Ne mund të ballafaqohemi në mënyrë efektive me Putinin, vetëm nëse e pranojmë se sa shumë ai është nën ndikimin e marksizëm-leninizmit, dhe idesë së tij thelbësore se fuqia politike rritet vetëm nga tyta e armës.

Shënim: Lee Edwards, anëtar në Heritage Foundation. Ndër librat e tij të shumtë, përfshihet edhe një biografi mbi ish-presidentin amerikan Ronald Reagan./ “National Riview”-Përshtatur nga CNA.al