E fundit!

15:16 Aktualitet

Komunikimi me Ramën dhe kërcënimi nga Bajrat/ Koçeku flet për largimin nga Grupi i PS-së

Deputetja Marjana Koçeku ka folur ditën e sotme lidhur me ...

Kurt Volker: Diga Kakhovka u shkatërrua nga rusët, por kjo nuk do ta ndalë kundërsulmin e Ukrainës

10 Qershor 2023, 20:30, Blog Paolo Mastrolilli

Kurt Volker: Diga Kakhovka u shkatërrua nga rusët, por kjo nuk do ta

“Ne e dinim prej disa kohësh që rusët e kishin minuar Digën Kakhovka, që të ishte gati për t’u hedhur në erë nëse ata do ta konsideronin të dobishëm këtë akt. Rusët pritën deri tani, pasi shpresonin të rifitonin territoret e humbura në zonën përreth Kherson. Fakti që ata e hodhën në erë, tregon se kanë hequr dorë nga ideja për t’i rimarrë ato rajone”.

Kështu shprehet Kurt Volker, ish i dërguari i administratës amerikane për Ukrainën. Sipas tij, kundërsulmi ukrainas do të jetë gradual dhe do të vërë shumë në vështirësi dhe para dilemash të mëdha Moskën, sidomos në lidhje me Krimenë.

Pse shkatërrimi i digës i leverdis Moskës?

Për 2 arsye. E para për të shmangur përkohësisht vëmendjen, pasi e detyron Kievin të merret me emergjencës humanitare të shkaktuar nga përmbytjet. E dyta është ushtarake, pra pengimi i kundërsulmit të pritshëm.

A janë ato rajone të nevojshme që Zelensky të sulmojë Krimenë?

Këto zona do t’u jepnin ukrainasve shansin për t’u afruar dhe më pas goditur portin e Sevastopolit me raketat e tyre. Por unë isha në Kiev dy javë më parë, dhe duke biseduar me disa zyrtarë atje, mësova se plani i tyre nuk ishte të sulmonin atje, sepse lumi Dnjepër është shumë i gjerë, dhe kalimi i tij do t’i bënte shumë të cenueshme trupat ukrainase.

A është ende e mundur të goditet Krimea edhe pas përmbytjeve të shkaktuara nga shkatërrimi i digës?

Po, duke sulmuar nga lindja. Por përpara se ta bëjnë këtë, ukrainasit duhet të shkëputin urën tokësore që e lidh gadishullin me Rusinë.

A ka filluar kundërsulmi i shumëpritur i Ukrainës?

Po, prej disa kohësh, në kuptimin që ukrainasit kanë sulmuar tashmë linjat e furnizimit me karburant dhe municione, urat, hekurudhat, madje edhe bazat logjistike në territorin rus, për të dobësuar forcat e Moskës. Ata e çliruan Kersonin thuajse pa luftë.

Cilat janë qëllimet?

Të ndërpresin urën tokësore që ka krijuar ushtria ruse. Po ashtu, do të përpiqen të godasin sërish urën mbi Ngushticën e Kerçit, sepse në këtë mënyrë Moska do të detyrohet të furnizojë trupat në Krime vetëm nga deti. Por edhe atje ka rreziqe, sepse ukrainasit kanë raketa cilësore për t’i shënjestruar anijet ruse nga toka. Më pas do të synojnë të rimarrin pjesë të Donbasit, Bakhmutit dhe Luganskut. Në shumë raste, janë misione të vogla për të testuar rusët, dhe më pas për të vendosur se ku të nisë sulmi më i fortë.

A kanë ukrainasit armë të mjaftueshme për të pasur sukses?

Ata kanë në dispozicion 60.000 ushtarë të rinj të trajnuar mirë. Është një aftësi e rëndësishme, dhe ukrainasit duhet të jenë në gjendje të bëjnë më mirë se rusët. Kundërofensiva nuk do

të jetë një episod i vetëm i madh lufte, por një seri nismash të shpërndara që zbatohen gradualisht. Pra, Ukraina ka kohë për të marrë furnizime të tjera ushtarake.

Çfarë po ndodh në Belgorod?

Janë rusët që po luftojnë kundër regjimit, edhe nëse Moska po përpiqet ta mohojë atë. Sulmet e fundit shërbejnë për të krijuar një ndjenjë cenueshmërie në Rusi, për të çarë flluskën e operacionit special ushtarak në Ukrainë, dhe për ta detyruar Kremlinin të zhvendosë trupat nga fronti.

E njëjta gjë vlen edhe për dronët që kanë goditur së fundi Moskën?

Po. Ka shumë gjasa që ato të lëshohen nga brenda Rusia dhe nga vetë rusët, ndoshta në bashkëpunim me forcat speciale ukrainase.

Si i gjykoni kritikat e Prigozhin dhe Kadirov ndaj Putinit?

Ato tregojnë ekzistencën e një kundërshtie të brendshme shumë të fortë.

A mund të favorizojë kundërofensiva negociatat e paqes?

Nuk e besoj, sepse Putin nuk është i gatshëm të diskutojë seriozisht.

A do të paralajmërojë samiti i NATO-s në Vilnius anëtarësimin e Ukrainës?

Mendoj se po. Aleatët evropianë janë më mbështetës se sa SHBA-ja, dhe kjo për një sërë arsyesh. Ata e kanë bërë Ukrainën kandidate për anëtarësim në BE. Por tani është e qartë se nuk mund të jesh anëtar i BE-së pa qenë anëtar i NATO-s. Sigurisht, anëtarësimi nuk do të ndodhë që në samitin e Vilniusit, por diçka do të thuhet në këtë drejtim./ “La Repubblica” - Përkthyer nga CNA.al