U dhunuan nga 8 persona në Mal të Zi/ Tre të rinjtë mbërrijnë në Shqipëri, shoqërohen nga policë

7 Janar 2024, 10:38, Aktualitet CNA

U dhunuan nga 8 persona në Mal të Zi/ Tre të rinjtë

Policia e Shtetit ka bërë me dije se tre shtetasit shqiptarë, të cilët u dhunuan një ditë më parë nga 8 persona në Malin e Zi, pasi kanë kryer të gjitha procedurat dhe veprimet, janë nisur drejt Shqipërisë.

Për çështje sigurie ata janë shoqëruar deri në kufi nga efektivë policie.

Me të mbërritur në Shkodër kanë kryer të gjitha kontrollet mjekësore dhe janë në gjendje të mirë shëndetësore.

Ndër të tjera, bëhet me dije se policia malazeze po kryen hetime në lidhje me dhunën e ushtruar ndaj 3 shtetasve shqiptarë dhe po punohet për kapjen e autorëve.

Deri më tani janë identifikuar 3 prej autorëve.

"Në vijim të informacionit për tre shtetasit shqiptarë të dhunuar në Mal të Zi, ju informojmë se:

Policia malazeze ka kryer të gjitha veprimet e para procedurale dhe tre shtetasit shqiptarë kanë dhënë deklarime në prani të një avokati (njohës i gjuhës shqipe) dhe të përfaqësuesve të ambasadës shqiptare në Malin e Zi. Në përfundim të veprimave të para, tre shtetasit shqiptarë, me dëshirën e tyre, janë nisur për në Shqipëri.

Drejtuesit e Policisë së Shtetit iu kanë kërkuar homologëve të Malit të Zi, që për çështje sigurie, të tre shtetasit shqiptarë t’i shoqërojnë me punonjes policie, deri në kufi.

Tre shtetasit shqiptarë kanë mbërritur në PKK Muriqan, rreth ores 05:30 dhe janë pritur nga drejtuesit e pikës së kalimit kufitar Muriqan dhe të Drejtorisë Vendore për Kufirin dhe Migracionin Shkodër, të cilët i kanë shoqëruar deri në Spitalin Rajonal Shkodër ku shtetasit shqiptarë kanë kryer të gjitha kontrollet mjekësore, nga të cilat kanë rezultuar pa probleme.

Në lidhje me veprimet procedurale dhe identifikimin e autorëve, sipas informacionit të dërguar nga kolegët në Malit e Zi, rezulton se:

Policia ka ndërmarrë veprime me qëllim zbardhjen e të gjitha rrethanave në të cilat kanë mbetur të plagosur shtetasit shqiptarë.

Janë kontrolluar videot e kamerave të vëzhgimit nga ndërtesat pranë ngjarjes.

Përmes punës operative në terren, efektivët e policisë kanë identifikuar tre persona nga Herceg Novi, si autorë të sulmit fizik, identiteti i të cilëve më pas është përcaktuar dhe do merren masa për kapjen dhe arrestimin e tyre.

Ngjarja është dërguar për kompetencë te Prokurori i cili do të deklarojë kualifikimin ligjor të rastit.

Vijojnë intensivisht hetimet për identifikimin e autorëve të tjerë të përfshirë dhe për zbardhjen dhe dokumentimin e plotë ligjor të kësaj ngjarjeje", njofton policia./ CNA