SPAK-u thellon hetimin për drejtorët e Veliajt, sekuestron pasuri në emër të familjarëve të tyre

9 Korrik 2024, 11:22, Aktualitet CNA

SPAK

CNA ka raportuar pak muaj më parë se SPAK-u po heton pasuritë e kryebashkiakut Erion Veliaj dhe drejtorëve të Bashkisë Tiranë të përfshirë në aferat korruptive.(lexo këtu)

Ky hetim po thellohet me informacione që po mblidhen zyrtarisht për dhjetëra kompani dhe individë të cilët kanë pasur lidhje me drejtorët e dosjes “5D”.

CNA raportoi se për drejtorët e Bashkisë së Tiranës tashmë përveç akuzave në lidhje me kompaninë “5D” ka një hetim të imtësishëm për pasuritë e tyre, si i kanë vënë këto pasuri, cili ka qenë burimi i të ardhurave që ata kanë përdorur për pasuritë e tyre e kështu me radhë.

Kjo është konfirmuar edhe njëherë sot, ku SPAK-u nëpërmjet një njoftimi zyrtar, ka bërë të ditur se ka sekuestruar kompaninë "5D", ku pronarë "de facto" janë Mariglen Qato dhe Redi Molla. Po kështu janë sekuestruar edhe pasuritë e familjarëve të Redi Mollës dhe Mariglen Qatos.

Pasuritë e sekuestruara:

-Shoqëria tregtare “5D Konstruksion” sh.p.k., së bashku me pasuritë e paluajtshme dhe të luajtshme në pronësi të saj, si shoqëri tregtare që është përdorur dhe ka shërbyer si mjet për të realizuar veprat penale, që lejohet të konfiskohet sipas nenit 36/1, shkronja (a) të Kodit Penal.
-Pasuria e paluajtshme e llojit truall me sipërfaqe 506.25 m² dhe ndërtesë me sipërfaqe 164 m², ndodhur në rrugën “Tefta Tashko”, Tiranë, regjistruar në emër të shtetasve S.M. dhe O.M., si pasuri e përfituar pjesërisht nga burime financimi që rrjedhin nga produkte të veprës penale.
-Pasuria e paluajtshme e llojit truall me sipërfaqe 51.3 m², ndodhur në rrugën “Tefta Tashko”, Tiranë, regjistruar në emër të shtetasve S.M. dhe O.M., si pasuri e përfituar pjesërisht nga burime financimi që rrjedhin nga produkte të veprës penale.
-Shoqëria tregtare “Restur” sh.p.k., së bashku me pasuritë e paluajtshme dhe të luajtshme në pronësi të saj, në zotërim të shtetasit R.M., si pasuri vlera e së cilës i korrespondon vlerës së produktit të veprës penale dhe që mund të konfiskohet bazuar në nenin 36/1 shkronja (ç) të Kodit Penal.
-Pasuria 24 % e kuotave në shoqërinë tregtare “Mediterranean Investment Group” sh.p.k., me seli në Durrës, regjistruar në emër të shoqërisë tregtare “Restur” sh.p.k., me ortak dhe administrator R. M., si pasuri vlera e së cilës i korrespondon vlerës së produktit të veprës penale dhe që mund të konfiskohet bazuar në nenin 36/1 shkronja (ç) të Kodit Penal.
-Pasuria e paluajtshme e llojit apartament me sipërfaqe të përgjithshme 122.7 m², me emërtimin B_43, si dhe pasuritë parkim Nr.P24 me sipërfaqe të përgjithshme 42 m² dhe parkim nr.P25 me sipërfaqe të përgjithshme 42 m², për të cilat është lidhur kontrata e sipërmarrjes midis shtetases S.Q. dhe shoqërisë “5D Konstruksion” sh.p.k., si pasuri që rrjedh nga produktet e veprës penale dhe për këtë shkak është pasuri që mundet të konfiskohet.
-Pasuria e paluajtshme e llojit apartament me sipërfaqe të përgjithshme 86.4 m², me emërtimin A_42, për të cilën është lidhur kontrata e sipërmarrjes datë 29.09.2023 midis shtetases S. Q. dhe shoqërisë “5D Konstruksion” sh.p.k., si pasuri që rrjedh nga produktet e veprës penale dhe për këtë shkak është pasuri që mund të konfiskohet./CNA