Skandali në Gjykatën Kushtetuese/ CNA jep detaje

2 Shtator 2024, 18:04, Aktualitet CNA

Skandali në Gjykatën Kushtetuese/ CNA jep detaje

Gjykata Kushtetuese

Sot në mesditë, CNA ka publikuar një lajm në lidhje me një informacion të plotë komunikimesh, të ardhur në redaksinë e CNA-së, për një anëtar të Gjykatës Kushtetuese dhe një tjetër person të përfshirë, një lidhje direkte e një ish-deputeti të Partisë Demokratike.

CNA njoftoi në shkrimin e parë se mesazhet nuk do t’i publikonte dhe ky është një vendim pa kthim. Pra, për arsye etike nuk do t’i publikojmë këto mesazhe, megjithëse pas daljes së lajmit kanë qenë të shumta komunikimet me stafin dhe drejtuesit nga personat e shqetësuar, apo të tjerë të përfshirë në komunikim.

Siç e raportuam në lajmin e parë, po e riktheksojmë se nuk do të publikojmë asnjë mesazh, pasi do të lëndonim shumë njerëz, familje, fëmijë apo të afërm. Qëllimi ynë nuk ka qenë në asnjë mënyrë dhe në asnjë rast i tillë.

Prag skandali në Gjykatën Kushtetuese
2 Shtator, 10:44

Ka qenë i diskutueshëm a duhet ta publikonin si lajm në rast se nuk publikonin emrat, por nuk ka më asnjë diskutim se lajmi duhet të jepej për arsye se tregon nivelin se ku ka katandisur Gjykata Kushtetuese dhe çfarë ndodh brenda këtij institucioni, që është ndoshta më i rëndësishmi i drejtësisë, i cili paguhet me taksat e qytetarëve shqiptarë dhe nuk është për histori rozë apo skandale të tilla.

Nuk do të publikojmë mesazhet dhe qëllimi ynë ka qenë totalisht profesional që të mos cënojmë jetën private të askujt, të mos dëmtojmë asnjë nga personat e përfshirë në këtë skandal, por të tregojmë se kush është ky institucion kushtetues, cilët janë anëtarët e Gjykatës Kushtetuese dhe çfarë ndodh brenda këtij intitucioni përtej fasadës së mureve dhe emrit të rëndësishëm që ka.

Detajet janë mjaft të thjeshta, janë komunikime mes dy personave. Diku kanë rrjedhur mesazhet, CNA vendimin e ka të padiskutueshëm.

Ne mund t’i vëmë mesazhet vetëm në dispozicion të institucioneve kushtetuese, pra të KLGJ-së, apo vetë Gjykatës Kushtetuese, por tek asnjë person tjetër apo në asnjë mënyrë nuk pranojmë t’i bëjmë publike. Ky është një vendim i pakthyeshëm i CNA-së dhe stafit të saj./ CNA