web counter
LEXO PA REKLAMA!

SHKARKO APP

App Store
Google Play

E fundit!

x

Shtohet numri i fëmijëve të shtruar në spitalin e Beratit/ Paraqiten me çrregullime gastrointestinale

2 Shtator 2025, 10:12, Aktualitet CNA

Shtohet numri i fëmijëve të shtruar në spitalin e Beratit/

Në Repartin e Pediatrisë në Spitalin Rajonal të Beratit janë paraqitur shumë raste të fëmijëve të prekur nga virozat.

Ditët e fundit është shtuar numri i rasteve, që paraqiten në këtë repart me çrregullime gastrointestinale dhe intoksikacione.

Këto viroza të shtuara kanë ardhur si rezultat i temperaturave të larta të 10-ditëshit të fundit të muajit gusht dhe ndryshimeve klimaterike e nivelit të lartë të lagështirës në ajër.

Shefi i Repartit, Vladimir Kumaraku, ka deklaruar se çdo ditë në spital ka rreth 15 shtrime të fëmijëve që paraqiten me çrregullime gastrointestinale.

“Ditët e fundit janë paraqitur raste me çrregullime gastrointestinale dhe ndryshe nga vitet e tjera, mund të themi se numri i rasteve të infeksioneve të aparatit gastrointestinal ka pasur këtë vit rritje. Këto raste virale janë shtuar për shkak të ndryshimeve klimatike, të nivelit të lartë të lagështirës në ajër dhe temperaturave të larta.

Në Repartin e Pediatrisë janë shtruar pothuajse çdo ditë nga 10-15 fëmijë me çrregullime gastrointestinale, nga të cilët shumicën ne i kemi trajtuar në Repartin e Urgjencës së Pediatrisë, ndërsa në Repartin e Infektivit ka pasur 2-3 raste çdo ditë me komplikacione.

Ecuria e fëmijëve të sëmurë ka qënë e mirë dhe pa komplikacione të rënda. Këto çrregullime gastrointestinale kanë klinikën e tyre të përhershme, me dhimbjet e barkut, me dhimbjet e stomakut, me të vjella dhe me diarre të theksuar. Moshat më të prekura janë moshat nga 0-3 vjeç, kurse rastet me intoksikacione kanë prekur moshat më të larta.

Të gjitha rastet e virozave janë trajtuar me infuzione dhe me Ringer”, ka deklaruar Kumaraku./ CNA





Lajmet e fundit nga