web counter
LEXO PA REKLAMA!

SHKARKO APP

App Store
Google Play

E fundit!

x

Shkarkimi nga puna i Edvin Shvarc/ Fevziu: Për një mik të vjetër që e takoj kaq rrallë

25 Gusht 2022, 21:43, Aktualitet CNA
Shkarkimi nga puna i Edvin Shvarc/ Fevziu: Për një mik të
Gazetari Blendi Fevziu

Gazetari Blendi Fevziu ka reaguar për shkarkimin nga puna në Presidencë të Edvin Shvarc, djalit të përkthyesit të madh me origjinë hebreje, Robert Shvarc.

Fevziu kujton se si është njohur në bankat e shkollë me Edvin Shvarc dhe dashurinë e këtij të fundit për Shqipërinë.

Gazetari tregon se që pas punësimit në Presidencë, Shvarc e takonte shumë më rrallë se më parë, ndërsa shprehet i habitur për arsyen e shkarkimit nga puna.

Shkrimi i plotë i Blendi Fevziut:

Për një mik të vjetër që e takoj kaq rrallë

Ishte studenti më i heshtur, por padyshim edhe ndër më të mirët e degës së letërsisë. Kështu e njoha në Fakultet, Edvin Shvarcin, djalin e Robert Shvarcit që më kishte mahnitur me përkthimet e tij e më vonë, kur e njoha, me formimin e tij intelektual.

Edvini ishte kurioz, dinte pothuaj gjithçka dhe dilte tej perdes që mundohej të na ndante nga bota. Ishte nga ata që flisnin pak, por edhe nga ata që nuk e donin komunizmin. Në 9 Dhjetor 1990 ishim bashkë në demostratën e studentëve tek Liceu Artistik. Njeriu më fjalëpak i fakultetit ishte në rreshtat e para. Po atë mbrëmje solli në Qytetin Studenti një flamur pa yll. Ishte një flamur i çetave patriotike që zoti e di si kishte mbijetuar. Ishte flamuri i parë që studentet valvitën dhe i pari pa yll publikisht pas 46 vitesh komunizëm.

Që nga ajo kohë e pashë pak. Iku në Nju Jork ku u ridiplomua dhe ku qëndroi më shumë se 10 vjet. E takoja herë herë atje. E donte shumë Shqipërinë dhe i mungonte Tirana. Këtë ma thoshte gjithnjë. Në 2002 erdhi të përcillte për në banesën e fundit babain që ndërroi jetë. Një intelektual që ende sot të gjithë e kujtojnë me nderim.

- Më tha nuk do kthehem më. Nuk jetoj dot në Nju Jork, e dua shumë Tiranën.

Filloi punë në stafin e Presidentit Moisiu. Që nga ajo kohë e kam parë shumë rrallë. Zakonisht në evente ku ishte prezent. Punoi pa ndalim për Presidentin Moisiu, Topi, Nishani, Meta. Ka 20 vjet në atë detyrë. Një zyrtar perfekt, nga ata që kaq shumë i mungojnë këtij vendi. Një njeri që dinte si sahat çdo sekondë të punës së tij. Një zyrtar që do ta kishte zili kushdo.

Sot mora vesh që e kanë hequr. Pyeta dhe më thanë që nuk ka njësuar diplomën që ka marrë në Nju Jork me atë në Shqipëri. Dhe mesa duket diploma amerikane nuk qenka e vlefshme sa ajo e Tiranës. Po a është diploma kaq e rëndësishme për një njeri që ka 20 vjet që është ikonë e atij institucioni. Nuk e di! Di vetëm që Edvin Shvarc nuk do jetë më aty dhe shpresoj që s’do kthehet më mbrapsht. Në Nju Jork. Sepse në punë apo i larguar, atë do ta marrë gjithnjë malli shumë për Tiranën. E do shumë Shqipërinë./ B.A. - CNA.al





Lajmet e fundit nga