web counter
LEXO PA REKLAMA!

SHKARKO APP

App Store
Google Play

E fundit!

x

Pse “Top Channel” dhe “Big Brother” duhet ta falënderojnë Policinë e Shtetit?!

5 Mars 2024, 13:56, Aktualitet CNA
Pse “Top Channel” dhe “Big Brother” duhet ta
“Top Channel”

Dy ditë më parë, Policia e Shtetit shkoi te kapanoni i një spektakli në Kashar të Tiranës, i cili pretendohet se është shtëpia më e famshme në Shqipëri, kur në fakt është një kapanon që shërben si një skenë për një “show”, ku shoqëroi për në komisariat dhe nga aty drejt burgut një person të dënuar me vendim gjykate.

Për arrestimin ka pasur disa reagime. Avokati thotë se nuk ka qenë në dijeni, dikush ka sulmuar Policinë e Shtetit, një tjetër thotë se për 17 bileta, e kështu me radhë.

Në fakt, duke lënë mënjanë Liamin si personazh, si “showman”, si pjesë e “Big”-ut, është dënuar nga gjykata, me vendim gjykate dhe ky është parimi numër një, i padiskutueshëm.

Proces i drejtë apo i padrejtë, në gjykatë ka përfunduar. Përgjegjësia për mospjesëmarrjen në gjyq është e tij sepse ai mund të thotë nuk kam qenë në dijeni, por si u shpik dhe ku mbiu avokati ditën e fundit, apo si erdhi në Shqipëri.

Të gjitha këto kanë pak rëndësi, rëndësi ka një fakt, Policia e Shtetit ka zbatuar ligjin. Personi ka hyrë në Shqipëri, ka qenë apo jo në sistemin TIMS kjo nuk dihet, ka një dënim, është kërkuar, e ka gjetur një zyrtar shteti, e kanë raportuar, e kanë çuar në burg.

Kjo po bën lajmin e madh, që në fakt është suksesi më i madh i këtij “Big Brother”-i.

Ndryshe nga ai i vitit të kaluar që ishte një spektakël audience, ky i këtij viti, edhe nga të ardhurat, edhe nga audienca, përveç personazheve zhurmues, pa etikë, sharjeve, fyerjeve, etj., nuk duket të jetë “show” si i mëparshmi dhe lajmi më i madh i tij është arrestimi i Liamit brenda shtëpisë së “Big Brother”-it që e mori vesh e gjithë Shqipëria.

Pse “Top Channel” dhe “Big Brother” duhet ta
Spektakli i "Big Brother"

Prandaj, autorët e emisionit më shumë se të sulmojnë, apo opinionistët e tij, të akuzojnë Policinë e Shtetit, në fakt duhet ta falënderojnë atë, sepse “Big”-un që nuk e shihte askush, do ta shohin më shumë të martën apo në ditë të tjera se cili nga personat me precedentë penalë do të futet brenda, ashtu siç CNA e ka raportuar më parë, apo se kush mund të arrestohet si personazh i dënuar nga drejtësia.

Nga ana tjetër, audiencën e përfitoi “Top”-i, edhe “Big Brother”-i, pasi spektakli nuk ka dhënë asgjë që të linte dikë me gojëhapur. Edhe arrestimi nuk është ndonjë çudi e madhe sepse në “Big Brother” Liami nuk është i vetmi me precedentë penalë, ka pasur edhe personazhe të tjera atje brenda, siç është normalisht shoqëria shqiptare.

Por Policia e Shtetit nuk duhet sulmuar, Policia e Shtetit duhet falënderuar që ka kurajë, shkon te godina e “Top Channel”-it dhe arreston një person në kërkim.

Ajo që duhet kërkuar nga Policia e Shtetit është zbardhja e ngjarjes kriminale rreth një vit më parë në këtë godinë, ku mbeti i vrarë roja, arsyeja e vërtetë e kësaj ngjarjeje, pse u derdhën plumbat mbi “Top Channel”.

Në atë kohë u viktimizua kjo media dhe u tha se kishte ndodhur për shkak të detyrës, por e vërteta ende nuk dihet, cilat janë arsyet që u qëllua mbi “Top Channel”-in, një person humbi jetën dhe “Top Channel” hesht.

Një media normale në botë nuk do të bënte zhurmë për arrestimin e Liamit, por nuk do të pushonte 24 orë në 24 për plumbat që i qenë derdhur mbi godinë, për t’u zbuluar e vërteta, për t’i treguar publikut se ishte sulmuar për shkak të detyrës që bënte, por në fakt është heshtur, çka të jep të drejtën të ngresh të gjitha dyshimet se sulmi nuk ka qenë për detyrën, por për diçka tjetër përtej detyrës se edhe vetë “Top Channel” hesht.

Pse “Top Channel” dhe “Big Brother” duhet ta
Godina e “Top Channel” pas breshërisë me armë

Më shumë qan hallin e Liamit sesa plumbat që u derdhën mbi godinë, ndaj ky është rast për ta falënderuar Policinë e Shtetit për Liamin dhe është rasti për ta sulmuar për heshtjen që ky institucion ka bërë për zbardhjen e ngjarjes dhe sulmin mbi godinën e televizionit më të madh, që në kapanonin e tij zhvillon “reality show”-n, “Big Brother”./ CNA





Lajmet e fundit nga