web counter
LEXO PA REKLAMA!

SHKARKO APP

App Store
Google Play

Protestat në Maqedoninë e Veriut/ Universiteti i Tiranës: Kërkesa e tyre, aspiratë e drejtë për barazi

6 Prill 2026, 13:22, Aktualitet CNA

Protestat në Maqedoninë e Veriut/ Universiteti i Tiranës:

Universiteti i Tiranës mbështet protestën e studentëve shqiptarë në Maqedoninë e Veriut.

Në reagimin publik të Universitetit të Tiranës theksohet se studentët po kërkojnë realizimin e një të drejte themelore, përdorimin e gjuhës së tyre amtare në proceset arsimore dhe profesionale.

Më tej nënvizohet se kërkesa e studentëve shqiptarë për të zhvilluar provimet shtetërore në gjuhën shqipe përfaqëson një aspiratë të drejtë për barazi, dinjitet dhe mosdiskriminim.

“Universiteti i Tiranës shpreh mbështetjen e plotë për studentët shqiptarë në Maqedoninë e Veriut, të cilët po kërkojnë realizimin e një të drejte themelore: përdorimin e gjuhës së tyre amtare në proceset arsimore dhe profesionale.

E drejta për t’u arsimuar dhe për t’u vlerësuar në gjuhën amtare nuk është privilegj, por një standard i njohur ndërkombëtarisht dhe një element thelbësor i barazisë reale në shoqëri shumëgjuhëshe. Kur studentët ndjekin studimet e tyre në një gjuhë të caktuar, është e drejtë legjitime që edhe vlerësimi përfundimtar profesional të bëhet në të njëjtën gjuhë.

Kërkesa e studentëve shqiptarë për të zhvilluar provimet shtetërore në gjuhën shqipe përfaqëson një aspiratë të drejtë për barazi, dinjitet dhe mosdiskriminim. Mosrespektimi i këtij parimi rrezikon të krijojë pengesa të panevojshme në zhvillimin profesional të tyre dhe të cenojë besimin në institucionet shtetërore.

Universiteti i Tiranës mbështet çdo përpjekje që synon forcimin e të drejtave gjuhësore dhe garantimin e standardeve të barabarta në arsim dhe në jetën publike. Ne inkurajojmë institucionet përkatëse që, në frymën e ligjit dhe të bashkëjetesës demokratike, të gjejnë zgjidhje të drejta dhe gjithëpërfshirëse.

Respektimi i diversitetit gjuhësor nuk është vetëm detyrim ligjor, por edhe vlerë që pasuron shoqërinë dhe forcon kohezionin social në rrugën e integrimit të rajonit në Bashkimin Evropian!”, thuhet në reagimin e Universitetit të Tiranës./ CNA





Lajmet e fundit nga