Peleshi në Zagreb: Shqipëria dhe Ballkani Perëndimor, pjesë e arkitekturës së ardhshme europiane

25 Mars 2026, 13:17, Aktualitet CNA

Peleshi në Zagreb: Shqipëria dhe Ballkani Perëndimor, pjesë

Kryetari i Kuvendit të Shqipërisë, Niko Peleshi, mori pjesë në Samitin Parlamentar të Nismës së Tri Deteve, që po zhvillohet në Zagreb.

Në fjalën e tij, ai theksoi rëndësinë e ndërlidhjes infrastrukturore, energjetike dhe integrimit të Ballkanit Perëndimor në projektin europian. Kryetari Peleshi vlerësoi organizimin e samitit nga Parlamenti i Kroacisë dhe theksoi se, në një kohë pasigurish të reja në Europë, platforma të tilla bashkëpunimi janë më të domosdoshme se kurrë për të forcuar lidhjet ekonomike, energjetike dhe politike mes vendeve të rajonit.

Ai nënvizoi se Ballkani Perëndimor nuk duhet parë më si periferi e Europës, por si pjesë përbërëse e arkitekturës së saj të ardhshme, duke theksuar se gjeografia, zgjedhjet politike dhe rrënjët kulturore të rajonit e mbështesin këtë perspektivë.

Kryetari theksoi se Shqipëria po shndërrohet gjithnjë e më shumë në një nyje strategjike që lidh Adriatikun dhe Jonin me rrjetet më të gjera europiane, duke kontribuar në stabilitetin dhe zhvillimin ekonomik të rajonit. Ai veçoi rëndësinë e projekteve të mëdha infrastrukturore dhe energjetike si Koridori VIII dhe Koridori Blu si edhe Gazsjellësi Trans Adriatik e Gazsjellësi i planifikuar Joniano-Adriatik, të cilët krijojnë një rrjet të integruar lindje-perëndim dhe veri-jug, duke lidhur porte, rrugë energjetike dhe qendra ekonomike në rajon.

Në këtë kuadër, Peleshi theksoi se integrimi i Ballkanit Perëndimor në Bashkimin Europian nuk është thjesht një çështje politike, por një domosdoshmëri strategjike për vetë Europën, pasi zgjerimi lidhet drejtpërdrejt me sigurinë dhe stabilitetin e kontinentit.

Ai nënvizoi gjithashtu rolin e Shqipërisë si faktor stabiliteti në rajon dhe rëndësinë e bashkëpunimit rajonal dhe diplomacisë parlamentare për forcimin e projektit europian.

Çfarë është Nisma e Tri Deteve

Nisma e Tri Deteve (Three Seas Initiative) është një platformë bashkëpunimi rajonal që lidh vendet e Europës Qendrore dhe Lindore mes Detit Baltik, Adriatik dhe Detit të Zi. Ajo synon të zhvillojë projekte të përbashkëta në fushën e infrastrukturës, energjisë dhe digjitalizimit, duke rritur ndërlidhjen dhe sigurinë ekonomike të rajonit.

Iniciativa u krijua në vitin 2015 dhe sot përfshin 13 vende anëtare të Bashkimit Europian, ndërsa disa vende të tjera, përfshirë Shqipërinë dhe Malin e Zi, marrin pjesë si partnerë.

Samiti parlamentar i zhvilluar në Zagreb mbledh kryetarë parlamentesh dhe deputetë nga vendet pjesëmarrëse dhe partnerët strategjikë për të diskutuar projektet e ndërlidhjes dhe bashkëpunimin politik në rajon./ CNA