Partia e Lirisë akuzon Veliajn: U vodhi shqiptarëve 45 milionë euro për 7 vite

27 Shtator 2023, 13:59, Aktualitet CNA

Partia e Lirisë akuzon Veliajn: U vodhi shqiptarëve 45 milionë

Sekretarja për Marrëdhëniet me Publikun në Partinë e Lirisë, Silva Caka

Partia e Lirisë ka akuzuar Erion Veliajn se u ka vjedhur shqiptarëve 45 milionë euro për 7 vitet e kaluara dhe nuk do të ndalet edhe për të paktën 3 vite të tjera.

Sekretarja për Marrëdhëniet me Publikun në Partinë e Lirisë, Silva Caka, në një deklaratë tha se mungesa e transparencës së bashkisë në raport me destinacionin e parave të vjela nga taksa e arsimit, është vetëm tregues i vjedhjes së parave të qytetarëve të Tiranës.

Ajo tha se me standardin evropian, Bashkia e Tiranës duhej të kishte ndërtuar mbi 40 shkolla të reja, por me standardin e vjedhjes së Erion Veliajt, me 45 milionë euro ndërtohen vetëm 9 shkolla.

Deklarata e plotë:

Erion Veliaj i vodhi shqiptarëve 45 milionë euro për 7 vitet e kaluara dhe nuk do të ndalë edhe për të paktën 3 vite të tjera.

Taksa e përkohshme e infrastrukturës arsimore, që Erion Veliaj e ktheu në taksë të përhershme, ka mbi 7 vite që vilet nga bashkia e Tiranës, por shërbimi i marrë mbrapsht për këtë taksë, është shumë larg asaj që pritej të realizohej në kohën kur u vendos taksa.

Erion Veliaj premtoi se me paratë e arkëtuara nga kjo taksë, do të përmirësonte infrastrukturën arsimore të shkollave publike në Tiranë, por ne të gjithë jemi dëshmitarë që shkollat publike të Tiranës janë në gjendje skandaloze: ngrohja nuk ekziston edhe pse jemi në vitin 2023, laboratorët janë një fjalë e huaj për fëmijët tanë dhe mësimi me turne të dyta e të treat vijon ende sot e kësaj dite.

Në studimin e fizibilitetit të sjellë në kohën që implementohej taksa e përkohshme e arsimit, flitej për rreth 40 shkolla publike të cilat do t’i nënshtroheshin transformimit, por nga investigimet e kryera nga mediat, rezultojnë se vetëm 9 prej tyre janë ndërtuar ose rikonstruktuar.

Mungesa e transparencës së Bashkisë në raport me destinacionin e parave të vjelura nga taksa e arsimit, është vetëm tregues I vjedhjes së parave të qytetarëve të Tiranës.

Kur pyetet se ku kanë shkuar këto para, Erion Veliaj na tregon përralla me suksese imagjinare, duke përfshirë si meritë e tij edhe shkollat që janë ndërtuar apo rikonstruktuar me paratë e donatorëve të huaj.

E meqënëse jemi këtu, i rikujtojmë gjithë qytetarëve shqiptarë se një shkollë me kapacitet të lartë nxënësish, e ndërtuar nga e para nga donatorët e huaj, nuk shkon më shumë 900.000 Euro, ndërsa po i njëjti volum punimesh, në dorën e çakallit të vjedhjes, kap vlerën e rreth 4 milionë euro.

Me standardin europian, Bashkia e Tiranës duhej të kishte ndërtuar mbi 40 shkolla të reja, por me standardin e vjedhjes së Erion Veliajt, me 45 milionë euro ndërtohen vetëm 9 shkolla.

E si të mos mjaftonte kjo vjedhje 7 vjeçare, pa asnjë justifikim, studim apo transparencë, Erion Veliaj kërkon të marrë edhe për 3 vite të tjera para nga kjo taksë, duke vjedhur në mënyrë të vazhdueshme banorët e Tiranës.

Mungesa e transparencës nga Erion Veliaj, tregon frikën e tij nga hajdutëria dhe abuzimi i përditshëm me taksat e qytetarëve.

Këshilltarët e Partisë së Lirisë në Këshillin Bashkiak të Tiranës, do të kërkojnë transparencë dhe llogaridhënie e do të ndjekim të gjithë rrugën e nevojshme ligjore për t’Ju informuar se ku shkojnë paratë e qytetarëve të Tiranës./ CNA