LEXO PA REKLAMA!

SHKARKO APP

Paralajmërimi për bojkot të seancave gjyqësore/ Manja, apel avokatëve

13 Qershor 2022, 14:48, Aktualitet CNA
Paralajmërimi për bojkot të seancave gjyqësore/ Manja, apel
Ministri i drejtësisë, Ulsi Manja

Ministri i Drejtësisë, Ulsi Manja, ka reaguar pas ultimatumit nga avokatët të cilët kanë kundërshtuar hartën e re gjyqësore dhe kanë paralajmeruar bojkot të seancave gjyqësore.

Në një prononcim për ATSH, ministri Manja sqaron se avokatët janë konsultuar me draftin e hartës gjyqësore dhe sugjerimet e tyre janë reflektuar në këtë draft, i cili pritet të kalojë për miratim në Qeveri.

Ministri thekson se bojkotimi i seancave gjyqësore nuk i shërben askujt, ndërsa apelon që avokatët të kontribuojnë në zbatimin e hartës së re gjyqësore.

“Avokatët janë grup interesi i rëndësishëm që garantojnë mbarëvajtjen e procesit të rregullt ligjor në zinxhirin e sistemit të drejtësisë dhe si të tillë janë konsultuar me draftin e hartës gjyqësore gjatë fazës së konsultimit publik.

Janë marrë në konsideratë disa sugjerime me vlerë që kanë ardhur edhe nga avokatia, të cilat janë reflektuar në draft, por riorganizimi gjyqësor është përgjegjësi e Këshillit të Lartë Gjyqësor si qeveri e gjyqësorit dhe e Ministrisë së Drejtësisë. Harta e re gjyqësore, referuar standardeve europiane, zbatimit të ligjeve të reja të Reformës në Drejtësi dhe gjendjes së sistemit të drejtësisë, krijon balancën e duhur mes aksesit të qytetarëve te drejtësia dhe eficiencës së sistemit gjyqësor.

Ajo që ne presim nga Dhoma Kombëtare e Avokatisë dhe çdo avokat është që të kontribuojnë në zbatimin e hartës së re gjyqësore pasi ajo të miratohet në Qeveri dhe të hyjë në fuqi. Bojkotimi i seancave gjyqësore nuk është zgjidhja e duhur dhe nuk i shërben askujt, as sistemit të drejtësisë, as avokatëve dhe aq më pak interesave të qytetarëve që mbrohen prej tyre.

Si njerëz të ligjit, unë besoj se avokatët do të reflektojnë në vendimin e tyre pasi zbatimi i ligjit është emërues i përbashkët yni dhe që i shërben drejtësisë dhe interesit publik”, shprehet Manja./ CNA.al

Lajmet e fundit nga