E fundit!

09:27 Kronika

E rëndë në Korçë, 66-vjeçari i jep fund jetës

Rreth orës 08:40, në lagjen nr. 10, Korçë, një automjet ti...

Në sulm kundër SPAK-ut/ Gjykata Kushtetuese nuk distancohet nga bataku

4 Mars 2025, 14:56, Aktualitet CNA

CNA sot raportoi për sulmet dhe skenarët që po bëhen kundër SPAK-ut nga institucionet ku përfshihet dhe Gjykata Kushtetuese në lidhje me faktin që po kërkohet të rrëzohet vetingu brenda SPAK-ut dhe GJKKO-së.

Pas çorbës mediatike për përgjimin nga Prokuroria e Posaçme, të cilët e shitën si të ishte një shkelje, në fakt është krejt e kundërta, pasi prokurorët e SPAK-ut kanë të drejtën e përgjimeve për të siguruar provat dhe nuk bëhet fjalë për përgjime të thjeshta, por ashtu siç e theksuam bëhet fjalë për rrëzimin në Gjykatën Kushtetuese të dosjeve të SKY dhe Encrochat.

Në lidhje me këtë ka reaguar Gjykata Kushtetuese e cila shprehet se ajo udhëhiqet nga parimet e kolegjialitetit, pavarësisë dhe paaanësisë, të sanksionuara në ligjin themelor.

Gjykata ka theksuar se sikundër ka vepruar deri më tani, do të vijojë të ushtrojë kompetencat e saj me korrektësi, integritet dhe e pavarur ndaj çdo ndikimi apo presioni të jashtëm.

Kështu Gjykata Kushtetuese nuk është distancuar nga bataku mediatik apo skenaret për të goditur SPAK-un.

“Gjykata Kushtetuese, nisur nga debati mediatik i ditëve të fundit, për vënien nën përgjim nga Prokuroria e Posaçme të një gjyqtari kushtetues, që lidhet me ushtrimin e veprimtarisë së tij, konsideron me rëndësi që të sqarojë opinionin publik se në ushtrimin e misionit kushtetues për garantimin e epërsisë së Kushtetutës, ajo udhëhiqet nga parimet e kolegjialitetit, pavarësisë dhe paanësisë, të sanksionuara në ligjin themelor.

Gjykata është e vetëdijshme për ndikimin që ka veprimtaria dhe forca e autoritetit të saj ndaj aktorëve politikë dhe institucionalë, ndaj medias, palëve në proces, ashtu edhe ndaj opinionit publik. Për këto arsye, Gjykata ndjek rregullat e transparencës në vendimmarrje, me qëllim krijimin dhe ruajtjen e besimit publik ndaj saj.

Gjykata ka shprehur edhe më parë bindjen se ushtrimi i veprimtarisë në një klimë besimi nga kushdo i shërben forcimit të autoritetit të saj si organ kushtetues i pavarur, ndaj ka ngritur shqetësimin rreth keqinterpretimeve dhe përpjekjeve për ta përfshirë atë në debate të veshura nën petkun e diskurseve juridike për të paragjykuar vendimmarrje konkrete dhe për të ndërhyrë në pavarësinë e saj.

Pa dashur të bëhet pjesë e asnjë diskursi mediatik, Gjykata vlerëson të theksojë se procesi vendimmarrës në ushtrimin e funksionit për dhënien e drejtësisë kushtetuese bazohet në parimet dhe procedurat e parashikuara nga korniza kushtetuese dhe ligjore, duke qenë çdo vendimmarrje rezultat i një procesi diskutimesh të mendimeve dhe qëndrimeve të secilit gjyqtar kushtetues, sipas bindjes së tij të brendshme, për të cilat gëzon imunitet të garantuar nga Kushtetuta në ushtrim të funksionit të tij.

Gjykata, duke pranuar rëndësinë që ka në një shtet të së drejtës ushtrimi i kompetencave të çdo organi publik në respektim të kornizës kushtetuese dhe asaj ligjore, dëshiron të theksojë se ajo, sikundër ka vepruar deri më tani, do të vijojë të ushtrojë kompetencat e saj me korrektësi, integritet dhe e pavarur ndaj çdo ndikimi apo presioni të jashtëm”, njofton Gjykata Kushtetuese./ CNA